«Нагахь Ас бохург а ца деш, дерриг а хІара весеташ аш кхочуш ца дахь,
Ас шуна таІзар дийр ду. Кхерам а, хІоралла а, дагар а хоьцур ду Ас шуна тІе. Цара шун бІаьрса а гІелдийр ду, синош а бІарздийр ду. Аш ялта дІадер эрна хир ду, шун мостагІаша иза дуур долу дела.
«Нагахь шайн Везачу Деле аш ла а ца догІахь, ас тахана шайна хьоьхуш долу Цо тІедиллинарг кхочуш а ца дахь, хІокху неІалтех хьалхадевр дац шу:
НеІалт хир ду шуна гІалахь а, арахь а.
НеІалт хир ду шун ялтин тускаршна а, текхашна а.
НеІалт хир ду шух схьадаьллачу чкъурана а, шун лаьттах схьабаьллачу стоьмана а, шун стерчех а, уьстагІех а схьадаьллачу дохканна а.
НеІалт хир ду шуна чудовлуш а, арадовлуш а.
Шена тІера шу дІадерзарна, аш дечу муьлххачу гІуллакха тІехь Везачу Эло неІалт а, дохар а, вон болх а хуьлуьйтур бу шуна, шу хІаллакьхилла дІадовллалц.
Хьуна тІехь, дерриг а халкъ, неІалт ду, хІунда аьлча аша Суна къола до.