Книга От Матфея Cтих 14 | Параллельные места

Әмма Гайсә эндәшмәде. Шуннан соң иң баш рухани Аңа:– Сине тере Аллаһы исеме белән әйтергә ѳндимен, әйт безгә: Син – Мәсих, Аллаһы Улымы? – диде. Баш руханилар һәм аксакаллар Аны гаепли башлагач, Ул аларга җавап бирмәде. Һируд Аңа күп сораулар бирде; ләкин Гайсә аңа бер генә җавап та кайтармады. һәм, янә сарайга кереп, Гайсәдән:– Син кайдан? – дип сорады.Әмма Гайсә аңа җавап бирмәде. Һәрнәрсәгә тереклек бирүче Аллаһы алдында һәм Понти Пилатка шаһитлек биреп, хакыйкатьне икърар иткән Мәсих Гайсә алдында сиңа боерык бирәм:

Гадәттәгечә, идарәче, бәйрәм уңае белән, халык сораган бер тоткынны азат итә торган иде.

Ул вакытта даны киң таралган Бараб исемле бер тоткын бар иде.

Шуңа күрә, халык җыелгач, Пилат алардан сорады:– Кемне сезгә азат итүемне телисез: Барабнымы, әллә Мәсих дип аталган Гайсәнеме?

Чѳнки Пилат яһүд башлыкларының Гайсәне кѳнләшү аркасында тотып биргәннәрен белә иде.

Ул хѳкем итү урынында утырган чакта, аның хатыны аңа: «Бу тәкъва Кешегә каршы бернәрсә дә эшләмә! Бүген тѳшемдә Аның аркасында бик нык газапландым», – дип хәбәр иттерде.

Ә баш руханилар һәм аксакаллар исә Барабны азат итүен, ә Гайсәне җәзага тартуын таләп итәргә дип халыкны котырттылар.

Идарәче халык тѳркеменнән:– Сез кемне телисез? Сезгә икенең кайсысын азат итим? – дип сорады.– Барабны, – дип җавап бирделәр алар.

– Ә Мәсих дип аталган Гайсә белән нәрсә эшлим? – дип сорады Пилат.– Аны хачка кадакларга! – дип җавап бирде аларның барысы да.

– Ул нинди начарлык эшләгән соң? – дип сорады ул.– Аны хачка кадакларга! – дип тагын да кѳчлерәк тавыш белән кычкырды җыелган халык.

Пилат бернәрсә дә эшли алмавын, хәтта чуалыш чыгу мѳмкинлеген күреп, су китерергә кушты һәм халык алдында кулларын юды.– Бу Кешенең үлемендә минем гаебем юк, моңа сез җаваплы! – диде ул.

– Аның каны безнең һәм безнең балаларыбыз ѳстендә булсын! – дип җавап бирде бѳтен халык.

Шунда Пилат аларга Барабны азат итте. Ә Гайсәне исә камчылаткач хачка кадаклатырга тапшырды.