Книга От Матфея Cтих 36 | Параллельные места

Уӕд Ӕм Петр бахатыд: «Бамбарын нын кӕн ацы фӕсномыг ныхас». Адӕм куы ацыдысты, уӕд дыууадӕс ахуыргӕнинаджы, стӕй ма уым чи баззади, уыдон дӕр Ӕй фӕсномыг ныхӕсты тыххӕй бафарстой. Загъта ма сын: «Ацы фӕсномыг ныхас не 'мбарут, ӕви? Уӕд иннӕ фӕсномыг ныхӕстӕ та куыд бамбардзыстут? Ахӕм фӕсномыг ныхӕстӕй сын Йесо амыдта бирӕ, сӕ бон бамбарын цас уыд, уыйас. Ӕнӕ фӕсномыг ныхасӕй сын ницы дзырдта, Йӕ ахуыргӕнинӕгтӕн та хибарӕй ӕмбарын кодта ӕппӕт дӕр. Йесо адӕмы куы ныууагъта ӕмӕ хӕдзармӕ куы бацыд, уӕд Ӕй Йӕ ахуыргӕнинӕгтӕ бафарстой, цы фӕсномыг ныхас загъта, уымӕй. Йӕ ахуыргӕнинӕгтӕ Йӕ бафарстой: «Цы амоны ацы фӕсномыг ныхас?»

Йесо сын дзуапп радта: «Хорз мыггаг тауӕг Адӕймаджы Фырт у.

Хуым у дуне, хорз мыггаг – Хуыцауы Паддзахады хъӕбултӕ, хӕмпӕлгӕрдӕг та – хӕйрӕджы хъӕбултӕ.

Хӕмпӕлгӕрдӕг байтауӕг знаг у хӕйрӕг, хуымгӕрдӕнтӕ сты дунейы кӕрон, хуымгӕрдджытӕ та – зӕдтӕ.

Хӕмпӕлгӕрдӕг куыд ӕмбырд кӕнынц ӕмӕ йӕ арты куыд басудзынц, афтӕ уыдзӕн, дунейӕн йӕ кӕрон куы ӕрцӕуа, уӕд дӕр:

Адӕймаджы Фырт рарвитдзӕн Йӕ зӕдты, ӕмӕ Йын Йӕ Паддзахадӕй ӕрӕмбырд кӕндзысты, тӕригъӕды ӕфтыд чи уыди ӕмӕ иннӕты дӕр тӕригъӕды чи ӕфтыдта, уыдоны иууылдӕр;

Ӕмӕ сӕ баппардзысты судзгӕ пецы. Уым уыдзӕни кӕуын ӕмӕ дӕндӕгты хъыс-хъыс.

Уӕд рӕстытӕ хурау сӕрттивдзысты сӕ Фыды Паддзахады. Хъустӕ кӕуыл ис, уый хъусӕд!

Уӕларвон Паддзахад у быдыры ныгӕд хӕзнайы хуызӕн. Адӕймаг ӕй ссардта, фӕстӕмӕ йӕ баныгӕдта, цингӕнгӕ ацыд, ӕмӕ йӕм цыдӕриддӕр уыди, уый ауӕй кодта ӕмӕ балхӕдта уыцы быдыр.

Уӕларвон Паддзахад ма у хорз налхъуыт агурӕг сӕудӕджеры хуызӕн.

Уый иу зынаргъ налхъуыт куы ссардта, уӕд ацыд ӕмӕ йӕм цыдӕриддӕр уыди, уый ауӕй кодта ӕмӕ йӕ балхӕдта.

Уӕларвон Паддзахад ма у, денджызмӕ кӕй баппӕрстой ӕмӕ алыхуызон кӕсӕгтӕ чи ӕрцахста, ахӕм хызы хуызӕн дӕр.

Хыз куы байдзаг, уӕд ӕй раластой былмӕ, стӕй ӕрбадтысты ӕмӕ кӕсӕгтӕн сӕ дзӕбӕхтӕ нывӕрдтой чыргъӕдты, ӕвзӕрты та аппӕрстой.