Адӕмӕй иутӕ иу хъӕр кодтой, иннӕтӕ та – иннӕ. Ӕфсӕддон хицауӕн змӕсты тыххӕй йӕ бон бӕлвырдӕй базонын кӕй ницы уыди, уымӕ гӕсгӕ радта Павелы фидармӕ акӕныны бардзырд.
Иудейтӕ йӕ цӕмӕй зылын кӕнынц, уый бӕлвырдӕй базоныны тыххӕй ӕфсӕддон хицау дыккаг бон Павелы суӕгъд кодта йӕ рӕхыстӕй, радта алчерты ӕмӕ ӕппӕт синедрион ӕрӕмбырд кӕныны бардзырд, ӕмӕ сӕм ӕй ракодта.
Фӕлӕ быцӕу куы стынг, уӕд ӕфсӕддон хицау фӕтарст, Павелы фӕйнӕрдӕм уӕнггай куы фӕхӕссой, уымӕй. Ӕмӕ ӕфсӕддонтӕн бардзырд радта, цӕмӕй ӕрхизой, Павелы адӕмӕй байсой ӕмӕ йӕ фидармӕ акӕной.