Книга Бытие Cтих 33 | Параллельные места

Аллагь сени наслунгну артдырсын ва сагъа кёп санавда наслулар берсин дагъы! Бир хыйлы халкълар сенден таба болсун дагъы! Ибрагьимге берген шабагьатын О сагъа да, сени наслуларынга да берсин дагъы. Сен де Аллагь Ибрагьимге берген, сен гелгинчи болуп яшап турагъан топуракъгъа ес болуп токътажакъсан! Неге тюгюл де, Аллагь Оьзю танглагъанланы ва олагъа береген савгъатланы гьакъындагъы гьукмусун бир заманда да алышдырмай.

Шо сёзлени эшитип, Исав гючлю аччы тавуш этип къычырып йибере. Сонг атасына: – Мени де шабагьатла, атам! – деп тилей.

– Ининг мени ягъыма гелип, сагъа берилме герекли шабагьатны гьилла булан алып токътады, – дей Исгьакъ.

– Негьакъ тюгюл огъар Якъуб деп къойгъаны, о менден алдынлыкъ этегени бу экинчи керен! Башлап о мени биринчи болма ихтиярымны алды, гьали буса мени шабагьатымны да алды! Магъа гьеч бир шабагьат да къалмагъанмы экен дагъы? – дей Исав.

– Мен ону сени бийинг этдим, бары да агъа-инилерин огъар къуллар этдим, огъар ашлыкъны да, чагъырны да бердим. Сени учун не этип боламан дагъы, уланым? – дей Исгьакъ.

– Атам, сени биргине-бир шабагьатынг тюгюл ёкъму эди дагъы? Мени де шабагьатла, атам! – деп, Исав йылап йибере.

Исгьакъ буса огъар булай дей: – Сени яшавунг ерни берекетинден, кёкдеги янгурдан йыракъда болажакъ.

Сен къылычынг булан яшап туражакъсан, ининге къуллукъ этежексен. Тек шолай бир заман гележек – сен къаршылыкъ билдирип, бойнунгдагъы боюнсангны алып атажакъсан.

Атасыны шабагьатын алгъаны саялы, Исав Якъубгъа оьчлю бола. – Узакъ къалмай мени атам гечинежек, биз де ону артындан къайгъыра туруп къалажакъбыз. Сонг буса мен иним Якъубну оьлтюрежекмен, – деп ойлаша Исав.

Амма Ребекагъа уллу уланыны хыяллары гьакъында етишдирелер. О гиччиси уланы Якъубну ягъына чакъырып, огъар: – Агъанг Исав сени оьлтюрме айлана.

Уланым, мени сёзлериме тынгла: эркъардашым Лабанны ягъына, Гьаррангъа багъып къач.

Инингни къазапланыву басылгъынча, сагъа бакъгъан якъдагъы ачуву тайгъынча, о сен оьзюне этген затны унутгъунча, онда яшап турарсан. Сонг буса мен, артынгдан йиберип, сени гелтирермен. Ёгъесе, мен бирче экевню тас этежек гюн гелип къалажакъ! – дей

Ребека Исгьакъгъа: – Шу хетли тиштайпалар саялы яшавдан гёнгюм чыгъып тура. Эгер Якъуб да шулар йимик, ерли, хетли къызны къатын этип алса, магъа шолай яшав негердир? – дей.

← Предыдущая

Бытие

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50

Выбор основного перевода