Арадан эки йыл оьтюп, пача булай тюш гёре: о Нил оьзенни ягъасында токътагъан.
Нилден етти арив, семиз сыйыр чыгъып геле. Олар оьзенни ягъасындагъы къамушлукъда отлап тура.
Оланы арты булан Нилден дагъы да башгъа етти сыйыр чыгъып геле. Олар осал, арыкъ. Шо сыйырлар бирисилерини къырыйында токътай.
Бирден шо осал, арыкъ сыйырлар арив, семиз сыйырланы ашап къоялар! Пача уянып къала.
Янгыдан юхлагъанда, башгъа тюш гёре: бир саптакъда бёртюп толгъан етти будайбаш оьсе.
Олардан сонг топуракъдан, къургъакъ ел къурутгъан, осал етти будайбаш оьсе.
Шо осал будайбашлар бёртюп толгъан будайбашланы ашап къоялар. Пача уянып къала ва гёрген затлары тюш экенни англай.
Эртен бек гьалекленип, о Мисрини ичиндеги бары палчыланы ва ойчуланы чакъыра, олагъа гёрген тюшлерин хабарлай. Тек ону тюшлерин бирев де чечип болмай.