Сонг Аллагь Ибрагьимге булай дей: – Тек сен де, сени наслуларынг да Мени булан бегетген разилешивню наслудан-наслугъа кютмеге герексиз. Муна, Мен сизин булан бегетеген разилешив: сизин бары да эргишилеригиз сюннетленме герек.
Мени булан бегетилген разилешивню белгиси гьисапда сюннет этдиригиз.
Сизин янгы тувгъан гьар уланъяшыгъыз сегизинчи гюн сюннет этилме герек. Шолай наслудан-наслугъа юрюлюп турсун. Сени ожагъынгда тувгъан гьар уланъяш, сени наслунгдан болмай, ят халкълардан сатылып алынгъан буса да, сюннет этилме герек.
Оьзю булан разилешгени саялы, Аллагь Ибрагьимге сюннет этивню тапшургъан. Ибрагьимден Исгьакъ тувгъанда, сегизинчи гюн ону сюннет этген. Сонг Исгьакъдан Якъуб тувгъан, Якъубдан да он эки уллу атабыз тувгъан.