Олар Ибрагьимни заманында Ибрагьимни къуллары къазгъан къуюларын топуракъ тёгюп толтуралар.
Авимелегь де Исгьакъгъа: – Бизин къырыйыбыздан тайып, ари гет, неге тюгюл де сен бизден эсе хыйлы гючлю болуп токътадынг, – дей.
Исгьакъ да шо ерден тайып, ари гете. О Герар къолда чатыр къуруп орунлаша ва шонда ерлеше.
Онда о Ибрагьимни заманында къазылып, о гечинген сонг буса филистимлилер топуракъ булан басдырып къойгъан къуюланы янгыдан къазып ачма башлай. Шо къуюлагъа о Ибрагьим бир вакътилерде берген атларын къайтара.
Бир керен къолда Исгьакъны къуллары къазып булакъ чыгъара.
Тек герарлы къойчулар Исгьакъны къойчулары булан: «Шо сув бизинки!», – деп эришме башлайлар. Шо саялы Исгьакъ бу къуюгъа Эсек деп ат тагъа, неге тюгюл де олар ону булан эрише болгъанлар.
Башгъа къую къазалар, тек шону уьстюнден де эришивлюк бола. Шо саялы огъар Ситна деп ат тагъалар.
Шо заман Исгьакъ, дагъы да арекге гетип, бирдагъы къую къаза. Шону уьстюнден буса эришивлюк болмай. Шо къуюгъа Исгьакъ Регьобот деп ат тагъа. Шо «Биз шу топуракъда артсын деп, Раббибиз ахырда да бизге эркин топуракъ берди» деген затны англата болгъан.