Книга От Иоанна Cтих 9 | Параллельные места

Йесо дзуапп радта: «Ӕнӕуырнӕг ӕмӕ хӕлд фӕлтӕр! Кӕдмӕ уыдзынӕн уемӕ? Кӕдмӕ уын быхсдзынӕн? Ардӕм Мӕм ӕй ӕрбакӕнут». Ӕмӕ Мӕн чи уыны, уый Мӕ Рарвитӕджы уыны. Уый райгуырд ӕппӕт сфӕлдисыны размӕ, Уый у, цӕстӕй Кӕй нӕ уынӕм, уыцы Хуыцауы Халдих. Фырт у Хуыцауы намысы тӕмӕнкалгӕ рухс; Фыды ӕмӕ Фырты ӕрдзыхъӕд иу у. Фырт ӕппӕтыл дӕр хӕцы Йӕ тыхджын ныхасӕй; мах ссыгъдӕг кодта тӕригъӕдтӕй ӕмӕ уӕлӕрвты сбадти Дунедарӕджы рахиз фарс.

Ау, Ӕз Мӕ Фыдимӕ иу кӕй дӕн, ӕмӕ Мӕ Фыд Мемӕ иу кӕй у, уый дӕ нӕ уырны? Ӕз уын цы зӕгъын, уый Мӕхи номӕй нӕ дзурын – Мемӕ иу Чи у, Мӕ уыцы Фыд кӕны Йӕ хъуыддӕгтӕ.

Ӕууӕндут Мыл: Ӕз Мӕ Фыдимӕ иу дӕн, Мӕ Фыд та Мемӕ иу у. Кӕннод та ӕууӕндут Мӕ хъуыддӕгтӕм гӕсгӕ.

Ӕцӕг, ӕцӕг зӕгъын сымахӕн: Мӕныл чи ӕууӕнды, уый кӕндзӕн Мӕ хъуыддӕгты хуызӕн хъуыддӕгтӕ, ӕмӕ уыдонӕй ноджы стырдӕртӕ сараздзӕн, уымӕн ӕмӕ Ӕз Мӕ Фыдмӕ цӕуын.

Ӕмӕ Мӕ ном ссаргӕйӕ цыдӕриддӕр ракурат, уый уын ратдзынӕн, цӕмӕй Фырты фӕрцы Фыд равдиса Йӕ намыс.

Мӕ ном ссаргӕйӕ Мӕ цы ракурат, уый уын ратдзынӕн.

Кӕд Мӕ уарзут, уӕд ӕххӕст кӕндзыстут Мӕ фӕдзӕхстытӕ.

Ӕмӕ Ӕз ракурдзынӕн Мӕ Фыдӕй ӕмӕ уын ратдзӕн, мыггагмӕ уемӕ чи уыдзӕн, уыцы иннӕ Рӕвдауӕджы –

Ӕцӕгады Уды. Дунейы бон Йӕ райсын нӕу, уымӕн ӕмӕ Йӕ нӕ уыны ӕмӕ Йӕ нӕ зоны. Сымах та Йӕ зонут, уымӕн ӕмӕ Уый уемӕ ис ӕмӕ уӕ зӕрдӕты цӕрдзӕн.

Сидзӕрӕй уӕ нӕ ныууадздзынӕн – ӕрцӕудзынӕн уӕм.

Иуцасдӕр ма, ӕмӕ дуне нал фендзӕни Мӕн, сымах та Мӕ фендзыстут, уымӕн ӕмӕ Ӕз цӕрын ӕмӕ сымах дӕр цӕрдзыстут.

Уыцы бон базондзыстут, Ӕз Мӕ Фыдимӕ иу кӕй дӕн, сымах Мемӕ иу кӕй стут ӕмӕ Ӕз уемӕ иу кӕй дӕн, уый.

Мӕ фӕдзӕхстытӕ кӕй зӕрдӕйы сты ӕмӕ сӕ чи ӕххӕст кӕны, уый Мӕ уарзы. Мӕн чи уарзы, уый та Мӕ Фыд бауарздзӕн, Ӕз дӕр ӕй бауарздзынӕн ӕмӕ йын Мӕхи раргом кӕндзынӕн».