Цатырӕн йӕ алыварс сараз кӕрт; кӕрты хуссар фарсыл хъуамӕ уа ӕмбӕрзӕн уӕздан виссонӕй, йӕ уӕрх – фондзыссӕдз ӕлмӕрины.
Кӕртӕн сараз ссӕдз цӕджындзы ссӕдз ӕрхуы бынӕвӕрӕнимӕ; цӕджындзтыл хъуамӕ уа ӕвзист къӕпсыртӕ ӕмӕ тӕлытӕ.
Кӕрты цӕгатварсыл кӕрӕйкӕронмӕ хъуамӕ уа ӕмбӕрзӕнтӕ; сӕ уӕрх – фондзыссӕдз ӕлмӕрины. Ӕмбӕрзӕнтӕн сараз ссӕдз цӕджындзы ӕмӕ ссӕдз ӕрхуы бынӕвӕрӕны. Цӕджындзыл хъуамӕ уа ӕвзист къӕпсыртӕ ӕмӕ тӕлытӕ.
Кӕрты ныгуылӕнварс уӕрхмӕ, кӕрӕйкӕронмӕ, хъуамӕ уа ӕмбӕрзӕнтӕ; сӕ уӕрх – дӕс ӕмӕ дыууиссӕдз ӕлмӕрины. Ӕмбӕрзӕнтӕн сараз дӕс цӕджындзы ӕмӕ дӕс бынӕвӕрӕны.
Скӕсӕнырдыгӕй кӕртӕн йӕ уӕрх хъуамӕ уа дӕс ӕмӕ дыууиссӕдз ӕлмӕрины.
Кӕртмӕ бацӕуӕнӕй иу къуыммӕ хъуамӕ уа ӕмбӕрзӕн; йӕ дӕргъ – фынддӕс ӕлмӕрины. Сараз ын ӕртӕ цӕджындзы ӕмӕ ӕртӕ бынӕвӕрӕны.
Бацӕуӕнӕй иннӕ къуыммӕ дӕр хъуамӕ уа ӕмбӕрзӕн; йӕ дӕргъ – фынддӕс ӕлмӕрины. Сараз ын ӕртӕ цӕджындзы ӕмӕ ӕртӕ бынӕвӕрӕны.
Кӕрты дуарӕн ӕмбӕрзӕн бауаф ӕрвхуыз, сырх ӕмӕ сӕнтсырх ӕндӕхтӕй ӕмӕ уӕздан виссонӕй нывӕфтыдтимӕ; йӕ уӕрх – ссӕдз ӕлмӕрины; сараз ын цыппар цӕджындзы ӕмӕ цыппар бынӕвӕрӕны.
Ӕппӕт цӕджындзтӕ кӕрты алыварс кӕрӕдзиимӕ хъуамӕ баст уой ӕвзист ӕлвасӕнтӕй; сӕ къӕпсыртӕ сын сараз ӕвзистӕй, сӕ бынӕвӕрӕнтӕ – ӕрхуыйӕ.
Кӕртӕн йӕ дӕргъ хъуамӕ уа фондзыссӕдз ӕлмӕрины, йӕ уӕрх – дӕс ӕмӕ дыууиссӕдз ӕлмӕрины. Ӕмбӕрзӕн хъуамӕ уа уӕздан виссонӕй; йӕ бӕрзӕнд – фондз ӕлмӕрины. Цӕджындзтӕн сӕ бынӕвӕрӕнтӕ хъуамӕ уой ӕрхуыйӕ.
Цатыр ӕрӕмбырд кӕнынӕн ӕмӕ райхалынӕн цы алыхуызон кусӕнгӕрзтӕ хъӕуы, уыдон иууылдӕр, стӕй йӕ хъилтӕ ӕмӕ кӕрты ӕппӕт михтӕ хъуамӕ уой ӕрхуыйӕ.