Йесо та ногӕй рацыди денджызы былмӕ. Уырдӕм Ӕм ӕрцыди бирӕ адӕм ӕмӕ сӕ ахуыр кодта.
Йесо Йӕ ахуыргӕнинӕгтимӕ араст денджызмӕ. Йӕ фӕдыл бирӕ адӕм ацыди Галилейӕ, Иудейӕйӕ,
Иерусалимӕй, Идумейӕ, Иорданы фаллаг фарсӕй, Тир ӕмӕ Сидоны алфамбылайӕ – ӕрцыд Ӕм бирӕ адӕм, цы хъуыддӕгтӕ аразы, уыдоны тыххӕй куы фехъуыстой, уӕд.
Ӕмӕ Йӕ ахуыргӕнинӕгтӕн бафӕдзӕхста бӕлӕгъ Ын цӕттӕйӕ дарын, утӕппӕт адӕм Ӕй куыд нӕ ныцъцъист кӕной, афтӕ.
Иухатт Йесо лӕууыди Геннисареты цады былыл ӕмӕ Йӕм бырстой адӕм, цӕмӕй байхъусой Хуыцауы ныхасмӕ.
Уыцы рӕстӕг Йесо федта дыууӕ бӕлӕгъы цады лӕугӕ; кӕсагахсджытӕ рахызтысты бӕлӕгътӕй ӕмӕ ӕхсадтой сӕ хызтӕ.
Йесо бахызт бӕлӕгътӕй иумӕ, Симоны бӕлӕгъмӕ, ӕмӕ йӕм бахатыди, былӕй иучысыл фӕхибар уӕм, зӕгъгӕ. Стӕй сбадт бӕлӕгъы ӕмӕ уырдыгӕй ахуыр кодта адӕмы.