Книга Исход Cтих 7 | Параллельные места

Саразӕнт ын мӕнӕ ахӕм дарӕс: риуылдарӕн хызын, ефод, уӕлгуыр, нывӕфтыд даргъ хӕдон, сарыхъ ӕмӕ рон. Сауджыны ахӕм сӕрмагонд дарӕс бахуыйӕнт де 'фсымӕр Ааронӕн ӕмӕ йӕ фырттӕн, ӕмӕ уыцы дарӕсы Мӕнӕн уыдзысты лӕггадгӕнджытӕ. Сыгъзӕрин хӕрдгӕбыдӕй, ӕрвхуыз, сырх ӕмӕ сӕнтсырх ӕндӕхтӕй ӕмӕ уӕздан виссонӕй уафт нывӕфтыд хъуымацӕй бахуыйӕд ефод. Ефодӕн йӕ дыууӕ кӕроны дӕр хъуамӕ уа дыууӕ уӕхскбосы. Ефодыл ӕддейӕ цы рон хуыд ис, уый дӕр ефодау хъуамӕ уа сыгъзӕрин хӕрдгӕбыдӕй, ӕрвхуыз, сырх ӕмӕ сӕнтсырх ӕндӕхтӕй ӕмӕ уӕздан виссонӕй. Тӕрхоны риуылдарӕн хызын бахуый нывӕфтыд хъуымацӕй; сараз ӕй ефоды хъуымацау – ӕрвхуыз, сырх ӕмӕ сӕнтсырх ӕндӕхтӕй ӕмӕ уӕздан виссонӕй.

Адӕм Мын сараздзысты кувӕндон, ӕмӕ Ӕз цӕрдзынӕн се 'хсӕн.

Мӕнӕ дын Ӕз ӕвдисын Цатыр, стӕй йӕ мигӕнӕнтӕ цавӕр хъуамӕ уой, уый; ӕмӕ ӕппӕт дӕр сараз афтӕ.

Акъацийӕ сараз Чырын; йӕ дӕргъ уӕд дыууӕ ӕлмӕрины ӕмӕ ӕрдӕг, йӕ уӕрх – ӕлмӕрин ӕмӕ ӕрдӕг, йӕ бӕрзӕнд – ӕлмӕрин ӕмӕ ӕрдӕг.

Мидӕгӕй ӕмӕ ӕдде йӕ сӕвдул сыгъдӕг сыгъзӕриндоны; уӕле йын йӕ кӕрӕттыл сӕвӕр сыгъзӕрин тӕлмытӕ.

Джиппы йын рауадз цыппар сыгъзӕрин цӕджы, ӕмӕ сӕ бафидар кӕн йӕ цыппар тигъмӕ: дыууӕ цӕджы – иуӕрдыгӕй, дыууӕ цӕджы – иннӕрдыгӕй.

Акъацийӕ сараз хъилтӕ, ӕмӕ сӕ сӕвдул сыгъзӕриндоны.

Чырыны тигътыл цӕгты атъысс хъилтӕ Чырын хӕссынӕн.

Уыцы хъилтӕ кӕддӕриддӕр хъуамӕ уой цӕгты, уырдыгӕй сын райсӕн нӕй.

Ӕз дын ратдзынӕн фидыды тыххӕй ӕвдисӕйнаг, ӕмӕ йӕ нывӕр Чырыны.

Чырыны сӕр сараз сыгъдӕг сыгъзӕринӕй; йӕ дӕргъ – дыууӕ ӕлмӕрины ӕмӕ ӕрдӕг, йӕ уӕрх – ӕлмӕрин ӕмӕ ӕрдӕг.

Сараз дыууӕ херувимы сыгъзӕринӕй; зӕрингуырд куыд аразы, афтӕ сӕ сараз Чырыны сӕры дыууӕ кӕроныл.

Херувимтӕй иу хъуамӕ уа Чырыны сӕры иу кӕрон, аннӕ та – йӕ иннӕ кӕрон. Херувимтӕ хъуамӕ къуыпп дарой Чырыны сӕры дыууӕ кӕроныл.