Иштта, Маннаша яхІудхошка къа латадайтира, ткъа цундела цара Везачу Элана зуламе хеташ долу гІуллакхаш леладора. Цул сов, Маннаша, бехке боцучеран цІий а Іанош, Ярушалайм-гІала цхьана йистера вукху йисте кхаччалц цІийх юьзира.
«Адаман кІант! Ярушалаймехь болчу нахе цара лелийна мел долчу вочу хІуманех лаьцна дІаала.
Царна тІехь кхел йийр ю ахь? Уьш бехке бе, адаман кІант! Царна дагадаийта церан дайша лелийна мел долчу дегазчу хІуманех лаций.
Хьалдолчу Эло иштта боху: «Къа ду цІий Іанадечу гІалин. Иза мекханан томмагІаш тІехь долчу ех тера ю, шена тІера телхинарг дІа ца даьллачу. Цу чуьра дакъош схьадаха, царах кхаж а ца тосуьйтуш.
Іанийна цІий цунна чохь ма ду. Иза тархана тІехь дитина цо, лаьтта тІе охьа а ца Іанош, цу тІе чан ца йиллийта.
Ас цІий тІулгаш тІехь дитина, иза къайла ца даккхийта. Ас иза дина адам оьгІаздахийта, цаьрга хІаллакбиначеран чІир эцийта».
Цундела Хьалдолчу Эло иштта боху: «Къа ду цІий Іанадечу гІалин. Ас-Айса йоккха цІе латор ю.
Бохам тІебогІу цІийх юьзначу гІалина! Харцдолчух а, схьаяьккхина хІонсах а юьзна ю иза, талораш дар а соцуш дац цигахь.