Стигална кІел къахьоьгуш, ша мел динчу хІуманах буьсун болу хІун пайда оьцу адамо?
ТІаккха со хьаьжира сайн куьйгаша динчу гІуллакхашка а, айса мел бинчу балхе а. И дерриг а ма кхетам тІе ца кхуьу хІума ду, махана Іуналла дан гІертар санна. Стигална кІел цу гІуллакхех буьсур болуш цхьа а пайда бац.
ТІаккха суна деза ца делира хІара дахар, хІунда аьлча стигална кІел мел дечу хІумано гІайгІанаш яхьа. И дерриг а кхетам тІе ца кхуьу хІума ду, махана Іуналла дан гІертар санна.
Дала Ша реза волчунна хьекъалалла а, хаарш а, ирс а ло. Ткъа къинош леточаьрга Цо, къа а хьоьгуьйтуш, хьал гулдойту, и гулдинарг Ша реза волчунна дІадалийтархьама. Иза а ду-кх кхетам тІе ца кхуьу хІума, махана Іуналла дан гІертар санна.
Суна гира, адамо мел дечу гІуллакхан говзалла шен накъостаца яхье ваьлча гучуйолий. Иза а кхетам тІе ца кхуьу хІума ду, махана Іуналла дан гІертар санна.
ГІенахь гиначуьнга сатуьйсуш лелачул, шен долахь долчух марзо эцар дикаха ду. Иза а кхетам тІе ца кхуьу хІума ду, махана Іуналла дан гІертар санна.