Книга От Луки Cтих 19 | Параллельные места

Уымӕн ӕмӕ хинымӕр дзырдта: «Ӕрмӕст Йӕ дарӕсыл Ын куы бандзӕвон, уӕд дӕр сдзӕбӕх уыдзынӕн». Уымӕн ӕмӕ Йесо сдзӕбӕх кодта бирӕты, ӕмӕ Йыл ӕппӕт рынчынтӕ ӕппӕрстой сӕхи, цӕмӕй Йыл бандзӕвой. Йесойы тыххӕй куы фехъуыста, уӕд чъылдымырдыгӕй ӕрбацыд адӕмы ӕхсӕнты ӕмӕ Йын бандзӕвыд Йӕ дарӕсыл. Иухатт Йесо ахуыр кодта адӕмы. Уым бадтысты фарисейтӕ ӕмӕ динамонджытӕ – ӕрцыдысты Галилейы ӕмӕ Иудейӕйы алы хъӕутӕй ӕмӕ Иерусалимӕй. Хуыцауы хъаруйӕ Йесо дзӕбӕх кодта рынчынты. Сылгоймаг чъылдымырдыгӕй бацыд Йесомӕ, бандзӕвыд Ын Йӕ пӕлӕзы коцорайыл, ӕмӕ уайтӕккӕ туг банцад йӕ цӕуынӕй.

Йесо Йӕ ахуыргӕнинӕгтыл ахаста Йӕ цӕст ӕмӕ райдыдта дзурын: «Тӕхудиаг стут, мӕгуыртӕ, – Хуыцауы Паддзахад сымах у.

Тӕхудиаг стут, абоны ӕххормӕгтӕ, – Хуыцау уӕ бафсаддзӕни. Тӕхудиаг стут, абоны кӕуджытӕ, – сымах сцин кӕндзыстут.

Тӕхудиаг уыдзыстут, Адӕймаджы Фырты тыххӕй адӕмӕн ӕнӕуынон куы уат, куы уыл бахъоды кӕной, цъыф уыл куы калой ӕмӕ уын уӕ ном куы сӕгад кӕной, уӕд.

Цин кӕнут уыцы бон ӕмӕ райут – уӕларвы уӕм ӕнхъӕлмӕ кӕсы стыр хорзӕх. Ацы адӕмы фыдӕлтӕ пехуымпартӕн дӕр афтӕ кодтой.

Фӕлӕ сар уӕ сӕр, хъӕздгуытӕ, – сымах ныридӕгӕн райстат уӕ хорзӕхы хай.

Сар уӕ сӕр, абоны ӕфсӕстытӕ, – сымах сыстонг уыдзыстут. Сар уӕ сӕр, абоны цингӕнджытӕ, – сымах скӕудзыстут ӕмӕ ныдздзыназдзыстут.

Сар уӕ сӕр, ӕппӕт адӕм дӕр уӕ хорзы кой куы кӕной, уӕд. Ацы адӕмы фыдӕлтӕ мӕнгпехуымпартӕй дӕр афтӕ ӕппӕлыдысты.

Фӕлӕ сымахӕн, Мӕнмӕ хъусджытӕн, зӕгъын: уарзут уе знӕгты, хорз кӕнут, сымахӕй йе сӕфт чи уыны, уыдонӕн,

Уе 'лгъитджытӕн хорзӕх курут Хуыцауӕй, кувут уе 'фхӕрджыты тыххӕй.

Де 'хсӕрфарс дын чи ныццӕва, уымӕ бадар иннӕ дӕр. Ӕмӕ дын исчи дӕ пӕлӕз куы иса, уӕд ын ратт дӕ хӕдон дӕр.

Чидӕриддӕр дӕ кура, уымӕн ратт, ӕмӕ дӕ чи цы айса, уый-иу фӕстӕмӕ ма ӕрцагур.

Адӕммӕ цӕмӕ ӕнхъӕлмӕ кӕсут, уый сын аразут уӕхӕдӕг дӕр.