Книга Исход Cтих 13 | Параллельные места

Выбор основного перевода

Открыть комментарий или сравнить с другим переводом

Выбор книги основного перевода

Исход Ветхий Завет

Новый Завет

От Матфея

От Марка

От Луки

От Иоанна

Деяния

Иакова

1. Петра

2. Петра

1. Иоанна

2. Иоанна

3. Иоанна

Иуды

К Римлянам

1. Коринфянам

2. Коринфянам

К Галатам

К Ефесянам

К Филиппийцам

К Колоссянам

1. Фессалоникийцам

2. Фессалоникийцам

1. Тимофею

2. Тимофею

К Титу

К Филимону

К Евреям

Откровение

Ветхий Завет

Бытие

Исход

← Предыдущая

Исход

Следующая →

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40

Хуыцау загъта Моисейӕн: «Ныллӕгъз кӕн дӕхицӕн дыууӕ къӕйдуры, фыццӕгты хуызӕн куыд уой, афтӕ. Ӕмӕ сыл Ӕз ныффысдзынӕн, ды цы къӕйдуртӕ асастай, уыдоныл цы фыст уыди, уый.

Ӕрбабонмӕ у цӕттӕ; сӕумӕйӕ схиз Синайы хохмӕ, ӕмӕ хохы сӕрыл ӕрлӕуу Мӕ разы.

Демӕ мачи ссӕуӕд, ӕппӕт хохыл цъиузмӕлӕг дӕр ма уӕд; суанг фысвос ӕмӕ стуртӕ дӕр хохмӕ хӕстӕг ма хизӕнт».

Моисей ныллӕгъз кодта дыууӕ къӕйдуры – фыццаг къӕйдурты хуызӕттӕ; сыстад сӕумӕйӕ ӕмӕ ссыди Синайы хохмӕ, Хуыцау ын куыд бафӕдзӕхста, афтӕ. Йемӕ схаста йӕ дыууӕ къӕйдуры.

Хуыцау ӕрцыд ӕврагъы, ӕрлӕууыд Моисеймӕ хӕстӕг ӕмӕ расидт Йӕ ном – Дунедарӕджы ном.

Хуыцау ацыди Моисейы рӕзты ӕмӕ расидт: «Дунедарӕг, Дунедарӕг, тӕригъӕдгӕнаг, рӕдаузӕрдӕ ӕмӕ бирӕбыхсон Хуыцау; Йӕ уарзт ӕмӕ Йӕ рӕстадӕн кӕрон нӕй.

Хӕрзаудӕн кӕны мингай фӕлтӕртыл, хатыр кӕны азым, фыдракӕндтӕ ӕмӕ тӕригъӕд. Фӕлӕ азымджыны растыл нӕ нымайы, фыдӕлты тӕригъӕды тыххӕй ӕфхӕры цоты ӕмӕ сӕ байзӕддаджы ӕртыккаг ӕмӕ цыппӕрӕм фӕлтӕрмӕ».

Моисей уайтӕккӕ ныллӕг акуывта, ӕрдӕлгом зӕххыл,

Ӕмӕ загъта: «Дунедарӕг, кӕд Дӕ аудыны аккаг сдӕн, уӕд Дунедарӕг Йӕхӕдӕг рацӕуӕд немӕ; ацы адӕм хивӕнд сты, фӕлӕ нын ныххатыр кӕн нӕ азым, нӕ тӕригъӕд, ӕмӕ нӕ скӕн Дӕ адӕм».

Хуыцау загъта: «Мӕнӕ Ӕз уемӕ аразын фидыд: ӕппӕт адӕмы раз Ӕз сараздзынӕн, ӕппӕт зӕххыл иу адӕмӕн дӕр кӕй нӕ сарӕзтӕуыд, ахӕм диссӕгтӕ. Ӕмӕ демӕ цы адӕм ис, уыдон иууылдӕр фендзысты Хуыцауы хъуыддаг; Ӕз дӕ фӕрцы цы саразон, уый сыл бафтаудзӕни Хуыцауы тас.

Ӕз уын абон цы фӕдзӕхсын, уый сӕххӕст кӕнут: Ӕз уӕ цурӕй лидзӕг кӕндзынӕн аморрӕгты, ханаанӕгты, хеттӕгы, ферезӕгты, хиввӕгты ӕмӕ иевусӕгты.

Уӕхи бахизут, кӕдӕм бацӕудзыстут, уыцы зӕххы цӕрджытимӕ цӕдис саразынӕй, науӕд сӕ къӕппӕджы бахаудзыстут.

Сӕ нывондхӕссӕнтӕ сын ныппырх кӕнут, кӕм фӕкувынц, сӕ уыцы дуртӕ ӕмӕ цӕджындзтӕ сын афӕлдахут.

Параллельные места

Исход 23:24

Уӕд сын сӕ хуыцӕуттӕм ма кувут ӕмӕ сын ма табу кӕнут, уыдонмӕ кувджытӕн сӕ хъуыддӕгтӕ ма фӕзмут, фӕлӕ сын ныддӕрӕн кӕнут сӕ мӕнгхуыцӕуттӕ ӕмӕ сын ныссӕттут, нывондтӕ кӕй цур хӕссынц, сӕ уыцы дуртӕ.

Кувут Дунедарӕгмӕ – ӕндӕр хуыцӕуттӕм ма кувут; ӕндӕр хуыцӕуттӕм куват, уый Дунедарӕг нӕ уарзы; нӕ бабыхсдзӕн. Йӕ ӕрдзыхъӕд ахӕм у.

Уыцы зӕххы цӕрджытимӕ цӕдис ма саразут; уымӕн ӕмӕ сӕ хуыцӕутты сӕраппонд сӕхи куы ӕлгъаг кӕной ӕмӕ сӕ хуыцӕуттӕн нывондтӕ куы хӕссой, уӕд уӕ ма фӕхоной ӕмӕ сӕ нывондтӕй ма фӕхъӕстӕ уат.

Уӕ лӕппутӕн сӕ чызджыты ма курут, науӕд сӕ чызджытӕ сӕ хуыцӕутты сӕраппонд сӕхи куы ӕлгъаг кӕной, уӕд уын уӕ лӕппуты дӕр фехалдзысты.

Джиппыуагъд хуыцӕуттӕ ма аразут уӕхицӕн.

Бӕрӕг кӕнут Донгонд дзулты бон. Ӕз уын куыд бафӕдзӕхстон, афтӕ Авивы мӕйы бӕлвырд рӕстӕг авд боны хӕрут донгонд дзул. Уымӕн ӕмӕ Мысырӕй Авивы мӕйы рацыдыстут.

Мадӕй райгуырӕг алы фыццаг фырт дӕр Мӕн у; афтӕ фыццагзад фос дӕр – родӕй уӕрыччы онг – Мӕн сты.

Хӕрӕджы фыццаг къӕлӕуы баив уӕрыккӕй. Кӕд ӕй нӕ баивай, уӕд ын йӕ бӕрзӕй асӕтт. Уӕ алы фыццаг лӕппуйы дӕр балхӕнут Мӕнӕй. Мӕ размӕ афтидармӕй мачи цӕуӕд.

Ӕхсӕз боны кусут, ӕвдӕм бон та уӕ фӕллад уадзут. Хуым кӕныны ӕмӕ хуымгӕрдӕнты афон куы уа, уӕд дӕр сабаты мацы кусут.

Мӕнӕу кӕрдын куы райдайат, уӕд бӕрӕг кӕнут Къуыриты бӕрӕгбон. Аз зымӕджырдӕм куы акъул уа, уӕд та бӕрӕг кӕнут Дыргътӕ тоныны бӕрӕгбон.

Уеппӕт нӕлгоймӕгтӕ афӕдз ӕртӕ хатты хъуамӕ ӕрлӕууой Дунедарӕджы, Израилы Хуыцауы, раз.

Уымӕн ӕмӕ Ӕз фӕтӕрдзынӕн адӕмты, фӕуӕрӕхдӕр уын кӕндзынӕн уӕ арӕнтӕ, ӕмӕ уын уӕ зӕхмӕ йӕ ныфс ничи бахӕсдзӕн, Дунедарӕджы, уӕ Хуыцауы, размӕ афӕдз ӕртӕ хатты куы цӕуат, уӕд.

Нывонд Мын куы хӕссат, уӕд ӕй ӕнхъызт хойрагимӕ ма ӕрхӕссут. Куадзӕны нывонды дзидзайӕ ӕрбабонмӕ хъуамӕ ма баззайа.

Уӕ зӕххы фыццаг тыллӕгӕн йӕ тӕккӕ хуыздӕр ӕрхӕссут Дунедарӕджы, уӕ Хуыцауы, хӕдзармӕ. Сӕныччы ма фыц йӕ мады ӕхсыры».

Хуыцау загъта Моисейӕн: «Ӕз дын цыдӕриддӕр загътон, уый ныффысс, уымӕн ӕмӕ Мӕ фидыд демӕ ӕмӕ Израилимӕ уыцы ныхӕстӕй у».

Моисей Хуыцаумӕ фӕци дыууиссӕдз боны ӕмӕ дыууиссӕдз ӕхсӕвы, хӕргӕ дӕр нӕ бакодта ӕмӕ дон дӕр нӕ банызта. Ӕмӕ къӕйдуртыл ныффыста фидыды (дӕс фӕдзӕхсты) дзырдтӕ.

Моисей Синайы хохӕй фидыды дыууӕ къӕйдуримӕ куы ӕрцӕйцыд, уӕд нӕ зыдта, Хуыцау йемӕ кӕй дзырдта, уымӕ гӕсгӕ йӕ цӕсгом тӕмӕнтӕ кӕй калы, уый.

Моисейы цӕсгом тӕмӕнтӕ кӕй калы, уый Аарон ӕмӕ израилаг адӕм куы федтой, уӕд ӕм бацӕуын нал уӕндыдысты.

Фӕлӕ сӕм Моисей куы басидт, уӕд ӕм ӕрбацыдысты Аарон ӕмӕ адӕмы ӕппӕт хистӕртӕ; ӕмӕ Моисей ныхас кодта семӕ.

Уый фӕстӕ ӕппӕт израилаг адӕм ӕрбацыдысты Моисеймӕ, ӕмӕ сын бафӕдзӕхста, Синайы хохыл ын Хуыцау цы дзырдта, ӕппӕт уыдӕттӕ ӕххӕст кӕнын.

Моисей семӕ йӕ ныхас куы фӕци, уӕд йӕ цӕсгомыл ӕруагъта ӕмбӕрзӕн.

Моисейиу Хуыцауимӕ дзурынмӕ куы цыд, уӕдиу йӕ цӕсгомӕй ӕмбӕрзӕн систа, цалынмӕиу рацыд, уӕдмӕ. Куыиу рацыд, уӕдиу израилаг адӕмӕн радзырдта, Хуыцау ын цы бафӕдзӕхста, ӕппӕт уыдӕттӕ.

Моисейы цӕсгом тӕмӕн кӕй калы, уый израилаг адӕм иууылдӕр уыдтой, ӕмӕиу Моисей йӕ цӕсгом бамбӕрзта, цалынмӕиу Дунедарӕгимӕ дзурынмӕ цыди, уӕдмӕ.

← Предыдущая

Исход

Следующая →

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40

Выбор основного перевода