1
Сайн беша веара со, сан йиша, сан нускал. Сайн хазачу хьожанашца сайн деза даьтта гулдира ас, сайн мазаца долу сайн алхаш диира ас, сайн шуьраца сайн чагІар мелира ас. Яалаш, доттагІий, малалаш, дуззалц малалаш, безам баханарш!
Хьан токхечу цІийнах дузуш ду уьш. Хьайх долучу диканан хица хьогалла дІайоккху Ахь церан.
Вало, Іаббалц безаман кад муьйлур бу вайшимма! Вовшех марзо а оьцуш, сахиллалц Іийр ду вайшиъ,
Сан дог йийсаре лаьцна ахь, сан йиша, сан нускал! Сан дог йийсаре лаьцна ахь, цкъа хьайн бІаьргийн нур а тоьхна, хьайн кочара цхьа жовхІар а къагийна.
Мерза моз ду хьан багара Іенаш, сан нускал. Хьан матта кІелахь шура а, моз а ду. Ливанунах йогІучу хьожанах тера ю хьан бедарийн хьожа.
Деза а, мерза а тайп-тайпана даьттанаш ду, хаза хьожа йогІучу массо а ковсташца а, дитташца а. Хаза хьожа йогІу сегІаз а, сарап а ду, тайп-тайпана духІиш а ду цигахь.
Сан везарг шен беша воьссина, мерзачу бецийн хаьснаш долчу, бошмашкахь жа дажо а, петІамат-зезагаш лахьо а.
Массо а ницкъийн Везачу Эло Цийон-лам тІехь массо а халкъан той хІоттор ду. Цу тойнехь жижиг а, чагІар а хир ду. Жижиг токхе хир ду, ткъа чагІар шира а, цІена а хир ду.
Везачу Эло боху: «Ва дерриге а хьогах дерш, хиш тІе схьадуьйла! Ва шайгахь ахча доцурш, схьадуьйла, эца, яа! Схьадуьйла, дети доцуш эца, ахча а ца луш, чагІар а, шура а эца!
Аш хІунда луш ду ахча шайна пайденна доцучух? Мах а луш, меца хІунда дуьсуш ду шу? Дика Соьга ла а догІий, мерзаниг дІадаа, тІаккха аша тоьллачу кхачанах дезар оьцур ду.
Нукха-Демис, буьйсанна Іийса волчу а веана, элира Цуьнга: «Рабби! Хьо Дала ваийтина устаз вуй хаьа тхуна. ХІунда аьлча шеца Дела ца хилча, цхьаьнгге а гайталур яц и Ахь гойтуш йолу тамашийначу гІуллакхийн билгалонаш».