Хуыцау арфӕ бафтыдта ӕвдӕм боныл, ӕмӕ йӕ скодта бӕрӕг бон, уымӕн ӕмӕ уыцы бон ӕрӕнцади, дуне сфӕлдисыны охыл кӕй арӕзта, Йӕ уыцы ӕппӕт хъуыддӕгтӕй.
Уӕ зӕрдыл дарут сабат, ӕмӕ уын уӕд Хуыцауӕн нывонд бон.
Ӕхсӕз боны кусут ӕмӕ аразут уеппӕт хъуыддӕгтӕ.
Ӕвдӕм бон та, сабат, раттут Дунедарӕгӕн, уӕ Хуыцауӕн. Уыцы бон мацы хъуыддаг аразут нӕдӕр уӕхӕдӕг, нӕдӕр уӕ фырттӕ, нӕдӕр уӕ чызджытӕ, нӕдӕр уӕ нӕлгоймаг ӕмӕ сылгоймаг цагъартӕ, нӕдӕр уӕ фос, нӕдӕр уе 'хсӕн цӕрӕг ӕрцӕуӕггаг.
Уымӕн ӕмӕ Хуыцау ӕхсӕз бонмӕ сфӕлдыста арв ӕмӕ зӕхх, денджыз, ӕмӕ денджызы цы ис, ӕппӕт уыдӕттӕ; ӕвдӕм бон та Йӕ фӕллад уагъта. Уымӕ гӕсгӕ Хуыцау арфӕ бафтыдта сабатыл ӕмӕ йӕ скодта бӕрӕг бон.
Ӕхсӕз боны кӕнут уӕ хъуыддӕгтӕ, ӕвдӕм бон та мацы кусут; дӕ гал дӕр ӕмӕ дӕ хӕрӕг дӕр уадз сӕ фӕллад суадзой, ӕрӕнцайой дӕ цагъар сылгоймаджы лӕппу дӕр ӕмӕ ӕрцӕуӕггаг дӕр.
Кусынӕн ис ӕхсӕз боны; ӕвдӕм бон – ӕнцойбон, сабат, Дунедарӕджы бӕрӕг бон. Сабаты чидӕриддӕр куса, уый амарут.
Ӕхсӕз боны аразут уӕ хъуыддӕгтӕ, ӕвдӕм бон та уын сыгъдӕг хъуамӕ уа – Дунедарӕгӕн нывонд ӕнцойбон. Уыцы бон чидӕриддӕр куса, уый амарут.
Сабаты уӕ цӕрӕнуӕтты арт ма скӕнут“».