Насиплидир тюз ёл булан юрюйгенлер, Раббибизни Къанунуна гёре яшайгъанлар.
Насиплидир Ону буйрукъларын сакълайгъанлар, бютюн юреги булан Ону излейгенлер.
Терс иш этмес олар, юрюп турар Ону ёллары булан да.
Сен буйрукъ этдинг къатты кюйде къанунларынгны кютсюн деп.
Гьар заман тюз ёл булан юрюген, къанунларынга да бойсынгъан болайым дагъы мен.
Гьеч илыкъмасман мен шо заман, буйрукъларынга да къарай туруп.
Тюз юрек булан шюкюрлюк этермен, адилли къанунларынга тюшюнюп мен.
Кютюп туражакъман къанунларынгны Сени; бир заманда да къоюп къойма дагъы мени!
Нечик сакъласын жагьил адам таза кюйде оьзюню ёлун? – Сени Каламынга гёре яшамакълыкъ булан.
Бютюн юрегим булан излеймен Сени, буйрукъларынгдан гьеч тайышма къойма чы мени.
Сагъа къаршы гюнагь иш этип къоймайым деп, бек аяп сакълагъанман юрегимде Каламынгны Сени.
Макътавлусандыр Сен, Раббим! Уьйретип тур чу къанунларынга мени.
Авзум булан билдирип турдум авзунгдан чыкъгъан бары да къанунларынгны Сени.
Гьар-бир байлыкъдан йимик сююнемен мен буйрукъларынгдан Сени.
Ойлашаман къанунларынгны гьакъында Сени, тергев беремен ёлларынга да Сени.
Къанып къаламан къанунларынгдан Сени; гьеч унутмайман Каламынгны да Сени.
Рагьмунгну гёрсетип къой чу Оьзюнгню къулунга, яшап къаларман, таби боларман мен де Каламынга Сени.
Ачып къой чу гёзлеримни мени, гёрюп къоярман мен де гьайранлыкъларын къанунунгну Сени.
Ёлавчумандыр бу дюньяда мен; яшырып къойма чы менден буйрукъларынгны Сени.
Гьалсыз болуп тура жаным мени, гьар заман къанунларынгны гёрме сююп Сени.
Енгип къойдунг Сен оьктемлени, налатлангъанланы, буйрукъларынгдан тайышагъанланы да.
Оланы мысгъыллавларындан, хорлавларындан азат этип къой чу мени, неге тюгюл де сакълап юрюймендир буйрукъларынгны Сени.
Гьакимлер олтуруп, тилбирчилик этип айланалар магъа къаршы, амма къулунг буса ойлашадыр къанунларынгны гьакъында Сени.
Маслагьатдыр, сююнчдюр магъа буйрукъларынг Сени.
Чанггъа айланып къалгъан жаным мени, жанландырып къой чу ваъданга гёре мени.
Билдирдим ёлларымны гьакъында мен, эшитдинг Сен де мени; уьйретип тур чу къанунларынга мени.
Къанунларынгда гёрсетилген ёлланы англама кёмек эт чи магъа, ойлашып турарман мен де гьайранлыкъларынгны гьакъында Сени.
Гьалсыз болуп бара къайгъыдан жаным мени, беклешдирип къой чу мени ваъданга гёре Оьзюнгню.
Арек эт чи менден ялгъанны ёлун, рагьмунг булан уьйретип тур чу магъа Къанунунгну Оьзюнгню.
Тангладым мен гьакъ герти ёлну, юрегим булан къабул этдим къанунларынгны да Сени.
Ябушуп къалгъанман буйрукъларынга Сени, Раббим, илыкъдырып къойма чы мени.
Буйрукъларынгда гёрсетилген ёлларда агъып туражакъ яшавум мени, неге тюгюл де генглешдиресендир юрегимни мени.
Гёрсет чи, Раббим, къанунларынгны ёлун, ахыргъа ерли тайышмай турарман мен де шолардан.
Эс тапдырып къой чу магъа, кютюп турарман, бютюн юрегим булан сакълап турарман мен де Къанунунгну Сени.
Салып къой чу буйрукъларынгны ёлларына мени, неге тюгюл де насипли болуп къаларман шо заман мен.
Сутурлукъгъа тюгюл, буйрукъларынга байлап къой чу юрегимни мени.
Сени ёлларынгдан юрюп болсун деп, къутгъарып къой чу мени оьлюмден.
Оьзюнгден къоркъагъанлагъа этген ваъдангны мени, Сени къулунг учун кютюп къой чу.
Оьзюнден мен бек къоркъагъан хорланывдан гери уруп къой чу мени, неге тюгюл де яхшыдыр къанунларынг Сени.
Огь, не гьасиретмен дагъы мен къанунларынгны кютме Сени! Оьзюнгдеги адиллик булан аманлыкъда сакълап тур чу мени.
Зор сюювюнг, Сен ваъда этген къутгъарылывунг етип къалсын дагъы магъа, Раббим.
Жавап къайтарарман мени хорлайгъангъа мен де, неге тюгюл де умут этемен Каламынга Сени.
Гьакъ герти сёзню сёйлеп болсун учун, гючюмден магьрюм этип къойма чы мени, неге тюгюл де умут этемен къанунларынга Сени.
Кютюп турарман Къанунунгну Сени гьар заман да, гьар даим де.
Эркин кюйде айланып турарман, неге тюгюл де кютюп юрюдюм къанунларынгны Сени.
Айтып юрюрмен пачаланы алдында буйрукъларынгны гьакъында Сени, гьеч илыкъма да илыкъмасман.
Къанып къаларман мен оьзлени сююп къалгъан буйрукъларынгдан Сени.
Узатарман къолларымны мен оьзлени сююп къалгъан буйрукъларынга Сени, ойлашарман къанунларынгны гьакъында да Сени.
Оьзюнде умут тувдургъан Оьзюнгню къулунга этген ваъдангны эсге алып къой чу Сен.
Гьар гезик яшавгъа къайтарып тура мени шо ваъданг Сени, къайгъымда да маслагьат болуп токътай магъа.
Эдепсиз кюйде кюлеп турдулар оьктемлер уьстюмден мени, амма гьеч тайышмадым мен Къанунунгдан Сени.
Эсге алып турдум бырынгъыдагъы къанунларынгны Сени, Раббим; гёнгюм де ачылып турду мени.
Эпсиз яман гьалгъа тюшюп гетемен Къанунунгну кютмейген къылыкъсызланы гёргенде мен.
Сапар чыкъгъан ерлеримдеги якълашывум болуп чыкъды къанунларынг Сени.
Гече де эсгерип турдум атынгны Сени, Раббим; сакълап турдум Къанунунгну да Сени.
Уьйренчикликге айланып битген къанунларынгны кютмек магъа.
«Ваъдаларынгны кютмек, Раббим, талигьимдир мени», – деп айтдым мен.
Гьакъ юрекден дуа этип турдум мен Сагъа: этген ваъданга гёре языкъсынып къал чы магъа Сен.
Ойлашып къарадым оьзюмню ёлларымны гьакъында мен, буйрукъларынга багъып абат да алдым.
Алгъасап турдум, гьеч асталашмадым буйрукъларынгны кютмек учун Сени.
Къылыкъсызланы торлары ташланды магъа, амма гьеч унутмадым Къанунунгну Сени.
Гечортада уянып турдум шюкюрлюк этмек учун адилли къанунларынг саялы Сени.
Къурдашымандыр мен Сенден къоркъагъанланы да, Сени къанунларынгны кютегенлени де барысыны да.
Сени зор сюювюнгден толгъан, Раббим, ер юзю; уьйретип къой чу мени Оьзюнгню къанунларынга.
Яхшылыкъ этип къойдунг Оьзюнгню къулунга, Раббим, этген ваъданга гёре Сен.
Сав гьакъылгъа да, билимге де уьйретип къой чу мени, неге тюгюл де аркъатаяйман мен буйрукъларынга Сени.
Адашып турдум азап чекгенче алдын мен, гьали буса буйрукъларынгны кютюп юрюймен мен.
Рагьмулусандыр, яхшы ишлени этеген Сенсендир – Оьзюнгню къанунларынга уьйретип къой чу мени.
Яман ялгъанлар айтып юрюр оьктемлер мени гьакъымда, мен бусам гьакъ юрекден кютюп турарман къанунларынгны Сени.
Рагьмусуз, сангырав болуп къалгъан юреклери оланы, мен бусам къанып къалып тураман Къанунунгдан Сени.
Къанунларынга уьйренип болсун учун, не яхшыдыр дагъы магъа азап чекме тюшгени.
Минг алтындан да, гюмюшден де яхшыдыр Сени авзунгдан чыкъгъан Къанун магъа.
Сени къолларынгдыр мени яратгъан да, мени амалгъа гелтирген де; эс тапдырып къой чу магъа, уьйренип къаларман мен де буйрукъларынгны Сени.
Каламынга аркъатаяйгъаным саялы, гёрюп йиберип мени, сююнюп къалар Сенден къоркъагъанлар.
Билемен, Раббим, къанунларынг тюз экенин де, адилли кюйде такъсырлагъанынгны да мени.
Къулунга этген ваъданга гёре, магъа маслагьат болуп къалсын дагъы зор сюювюнг Сени.
Языкъсынывунг етишип къалсын дагъы магъа, яшап къаларман мен де, неге тюгюл де къанып къалып тураман Къанунунгдан Сени.
Илыгъып къалсынлар дагъы оьктемлер, неге тюгюл де бир айыпсыз зулму этип туралар олар магъа; ойлашып тураман мен де къанунларынгны гьакъында Сени.
Магъа багъып къалсынлар дагъы Сенден къоркъагъанлар да, Сени буйрукъларынгны билегенлер де.
Мен биябур болуп къалмасын учун, юрегим толу кюйде къанунларынга берилип къалсын дагъы Сени.
Сенден гелеген къутгъарылывну къаравуллай туруп, гьалсыз болуп бара юрегим мени; аркъатаяйман сёзюнге Сени.
Сени ваъдангны къаравуллай туруп, гьалсыз болуп бара гёзлерим мени. «Къачан гёнгюмню аларсан мени?» – деймен мен.
Тютюнню ичиндеги тулукъдай болуп къалдым мен, амма Сени къанунларынгны чы унутмадым мен.
Дагъы да нечакъы заман къарап турма тарыкъман мен, къулунг Сени? Къачан этерсен дуванынгны гьызарлап юрюйгенлеге мени?
Сени Къанунунга тергев бермедилер олар, къую къазып токътадылар оьктемлер магъа.
Инамлыдыр бары да буйрукъларынг Сени; адилсиз кюйде гьызарлап туралар мени; кёмек этип къой чу магъа.
Аз къалдылар дагъытып къойма ер юзюнде мени, амма арт чы бермедим къанунларынга Сени.
Оьзюнгдеги зор сююв булан аманлыкъда сакълап къой чу мени, кютюп турарман мен де авзунгдан чыкъгъан буйрукъларынгны Сени.
Даимгедир, Раббим, токъташдырылгъаны кёклерде Каламынг Сени.
Наслудан наслугъа етип турар аминлигинг Сени. Сенсендир ер юзюн амалгъа гелтирген, токътап тура шо да.
Гьали болгъунча токътап тура къанунларынг, неге тюгюл де Сагъадыр бары да затны къуллукъ этегени.
Къайгъыгъа батып оьлюп къалар эдим мен, эгер де Къанунунгдан къанып турмагъан эдим буса мен.
Бир де унутмасман дагъы къанунларынгны Сени, неге тюгюл де шолар буландыр Сен аманлыкъда сакълап турагъанынг мени де.
Сеникимендир мен – къутгъарып къой чу мени, неге тюгюл де кютюп юрюймен къанунларынгны Сени.
Яшынып къаравуллап токътагъанлар къылыкъсызлар дагъытмакъ учун мени, мен буса теренлешип бараман буйрукъларынга Сени.
Дазуларын гёргенмен гьар-бир камилликни мен, амма гьисапсыз генгдир буйрукъларынг Сени.
Не сюемен дагъы Къанунунгну Сени! Ойлашып тураман сав гюн шону гьакъында да.
Душманларымдан да гьакъыллы этип къойдунг мени Оьзюнгню буйрукъларынг булан Сен, неге тюгюл де мени буландыр шолар гьар заманда да.
Устазларымдан да гьакъыллы болуп къалдым мен, неге тюгюл де ойлашып тураман буйрукъларынгны гьакъында Сени.
Къартлардан да англавлу болуп къалдым мен, неге тюгюл де кютюп тураман къанунларынгны Сени.
Каламынга гёре юрюмек учун, гери уруп юрюймен гьар-бир яманлыкъны ёлундан аякъларымны мени.
Гьеч тайышмайман къанунларынгдан Сени, неге тюгюл де Сенсендир уьйретеген мени.
Не татли тие дагъы тамагъыма сёзлеринг Сени! Балдан да татывлудур авзума шолар.
Сени къанунларынг англав берер магъа, шо саялы да гёрюп ярамайман яманлыкъны гьар-бир ёлун.
Аякъларым учун чыракъдыр, ёлумдагъы ярыкъдыр Каламынг Сени.
Ант этип турдум Сени адилли къанунларынга гёре юрюме мен, шолай этме де этермен мен.
Бек уллу къайгъы басып тура мени, Раббим; этген ваъданга гёре аман сакълап къой чу мени.
Авзум булан этген алгъыш савгъатны къабул этип къой чу, Раббим; Оьзюнгню къанунларынга да уьйретип къой чу мени.
Жаным гьаман увучумдадыр, амма Къанунунгну чу унутмайман Сени.
Торларын ташлап токътадылар къылыкъсызлар магъа, амма гьеч тайышмадым къанунларынгдан Сени.
Гьар даимги варислик йимик къабул этип турдум буйрукъларынгны Сени, неге тюгюл де юрегимни шатлыгъыдыр шолар.
Сени къанунларынгны гьамангъа, ахыргъа ерли кютювге багъышлап турдум юрегимни мен.
Гёрюп ярамайман Сагъа толу кюйде амин тюгюллени, Сени Къанунунгну буса сюемен.
Аркъатаявумсандыр, къалкъанымсандыр Сен мени; умут этемен Каламынга Сени.
Ари тайыгъыз чы менден, яманлар, кютюп юрюрмен мен де буйрукъларын Аллагьымны мени.
Беклешдирип къой чу этген ваъданга гёре мени, яшап къаларман мен де; биябур этип къойма чы умутумда мени.
Къолунг булан кёмек этип къой чу, къутгъарылып къаларман мен де; тергев берип турарман гьаман Сени къанунларынга мен де.
Гери уруп къоясан Сени къанунларынгдан тайышагъанланы барысын да, неге тюгюл де негьакъдыр гьиллалары оланы.
Кёмюрню кюлюдей сибирип ташлайсан бары да къылыкъсызланы ер юзюнден Сен, шо саялыдыр сююп къалгъаным да буйрукъларынгны Сени.
Титиреп гетер къаркъарам мени Сенден къоркъагъанлыкъдан, къанунларынгдан да къоркъаман мен Сени.
Адилли, тюз затны этип юрюдюм мен – мени гьызарлайгъанланы къолуна берип къойма чы Сен мени.
Къулунгну янын тутуп къой чу Сен, оьктемлер магъа зулмусун этмесин деп.
Гьалсыз болуп бара гёзлерим мени Сени къутгъарылывунгну да, герти ваъдангны да къаравуллай туруп.
Иш гёрюп къой чу Оьзюнгдеги зор сююв булан Сени къулунга, уьйретип къой чу мени де къанунларынга Сени.
Къулунгмандыр мен Сени; эс тапдырып къой чу магъа, тюшюнюп къаларман мен де буйрукъларынга Сени.
Етишди Раббибизге иш гёрме заман: бузуп-тозуп къойгъан Къанунунгну Сени.
Алтындан, таза алтындан артыкъ сюемен мен буйрукъларынгны Сени.
Адилли гёремен бары да къанунларынгны; гёрюп ярамайман гьар къайсы яман ёлну да мен.
Гьайрандыр буйрукъларынг Сени, шо саялы да кютюп юрюймен шоланы мен.
Англавсузланы ярыкъландырып, гьакъыллы этип къояр, маъналары ачылгъанда сёзлеринг Сени.
Кюстюнюп йиберемен авзумну ачып, неге тюгюл де гьасирет къалып тураман буйрукъларынга Сени.
Сени атынгны сюегенлеге этегенинг йимик, бир къарап, языкъсынып къал чы магъа.
Къатты басагъан этип къой чу абатларымны Оьзюнгню ваъданга гёре; елеме къойма чы гьеч бир къылыкъсызлыкъны да мени.
Сени къанунларынгны кютмек учун, азат этип къой чу адамланы зулмусундан мени.
Нюрлю юзюнг булан ярыкъландырып къой чу Оьзюнгню къулунгну, уьйретип къой чу Сени къанунларынга мени де.
Шарыллап агъар гёзьяшларым, неге тюгюл де сакъламай инсанлар Къанунунгну Сени.
Адиллисендир, Раббим, Сен, адиллидир къанунларынг да Сени.
Гертидир, гьакъ гертидир Оьзюнг васият этген буйрукъларынг Сени.
Рагьатлыкъ бермес гюнчюлюк магъа, неге тюгюл де унутуп къалгъан душманларым сёзлерингни Сени.
Артыкъ тазадыр Каламынг Сени, сююп къалгъан къулунг да шону.
Гиччимен, эсгик гёрюнемен мен, амма унутмайман къанунларынгны Сени.
Гьар даимгедир адиллигинг Сени, гьакъ гертидир Къанунунг да Сени.
Етишип къалгъан къайгъы булан азаплар магъа, къанып къалып тураман буйрукъларынгдан да Сени.
Даимгедир адиллилиги буйрукъларынгны Сени: англав берип къой чу магъа, яшап къаларман мен де.
Чакъырыв этермен бютюн юрегим булан Сагъа: жавап бер чи магъа, Раббим; кютюп турарман Сени къанунларынгны мен де.
Чакъырыв этермен Сагъа, къутгъарып къой чу мени, кютюп турарман буйрукъларынгны мен де.
Танг билингенче де туруп, кёмек тилермен мен; умут да этермен Каламынга Сени.
Каламынгны гьакъында ойлашмакъ учун, эртенги къаравулланыкинден де алдын ачыла гёзлерим мени.
Эшитип къой чу Оьзюнгдеги зор сююв булан тавушумну мени, Раббим; Оьзюнгню адиллигинге гёре аман сакълап къой чу мени де.
Ачувлу къаст булан ювукълашып гелдилер гьызарлап юрюйгенлер мени; арекдедир олар Къанунунгдан Сени.
Ювукъдасандыр Сен, Раббим; гьакъ гертидир бары да буйрукъларынг да Сени.
Тезден билегеним гьар даимге токъташдыргъанынгны буйрукъларынгны Сен.
Гёз къарат чы къайгъыма мени, къутгъарып да къой чу мени, неге тюгюл де унутмайман Къанунунгну Сени.
Баш къош чу ишиме мени, азат этип де къой чу мени; аман сакълап къой чу этген ваъданга гёре мени.
Арекдедир къылыкъсызлардан къутгъарылыв, неге тюгюл де кютюп юрюмес Сени къанунларынгны олар.
Кёпдюр рагьмулугъунг Сени, Раббим; аман сакълап къой чу Оьзюнгню адиллигинге гёре мени.
Кёпдюр гьызарлайгъанлар да, душманларым да мени, амма арекге чи чыкъмасман буйрукъларынгдан Сени.
Жиргенип йиберемен, гёрсем имансызланы, неге тюгюл де юрюмес олар Каламынга гёре Сени.
Бир къарап къой чу къанунларынгны нечик сюегениме мен; аман сакълап къой чу Оьзюнгдеги зор сююв булан, Раббим, мени.
Гьакъ гертидир кюрчюсюнденокъ да Каламынг Сени, гьар даимгедир гьар-бир адилли къанунларынг да Сени.
Бир айыпсыз гьызарлап юрюр гьакимлер мени; амма къоркъуп турар юрегим Каламынгдан Сени.
Зор уллу хазна тапгъандай сююнемен мен Каламынгдан Сени.
Гёрюп ярамайман ялгъанны, жиргенемен шондан; амма сюемен Къанунунгну Сени.
Гюнде етти керен макътавлар этемен адилли къанунларынг саялы Сени.
Зор уллудур парахатлыгъы Сени Къанунунгну сюегенлени, сюрюнмеклик де ёкъдур олагъа.
Умут этермен къутгъарылывунга Сени, Раббим, кютермен буйрукъларынгны да Сени.
Кютюп юрюрмен буйрукъларынгны Сени, нече де бек сюермен мен де шоланы.
Юрюп тураман къанунларынга, буйрукъларынга гёре Сени, неге тюгюл де гёрюп турасан бары да ёлларымны мени.
Агь урувум етишсин дагъы Сагъа, Раббим; англавлу этип де къой чу этген ваъданга гёре мени.
Эшитип къой чу дуамны мени; азат этип де къой чу этген ваъданга гёре мени.
Макътавлар чыгъып турар авзумдан мени, неге тюгюл де уьйретерсен Оьзюнгню къанунларынга.
Тилим йырлап турар Каламынгны гьакъында Сени, неге тюгюл де муъминдир бары да буйрукъларынг Сени.
Магъа кёмекге узатылсын дагъы къолунг Сени, неге тюгюл де танглагъанман къанунларынгны Сени.
Гьасирет къалып тураман Сенден гелеген къутгъарылывгъа, Раббим; къанып къалып тураман Къанунунгдан да Сени.
Сагъа макътав этип турмакъ учун, яшап турайым дагъы мен; магъа кёмек болуп къалсын дагъы къанунларынг да Сени.
Тас болгъан къойдай адашып къалгъанман мен; излеп табып къой чу мени, къулунгну Оьзюнгню, неге тюгюл де унутмагъанман буйрукъларынгны Сени.
Гьей англавсуз галатлар! Сизге ким гёз тийдирген? Иса Месигьни хачгъа илингени гьакъда сизге ачыкъдан айтылгъан эди чи!
Магъа булай бир суалгъа жавап беригиз гьали: сиз Аллагьны Ругьун Мусаны Къанунуну юрютегенигиз саялы алдыгъызмы яда эшитгенлеригизге инангъаныгъыз саялы алдыгъызмы?
Сиз шо даражада англавсузмусуз? Аллагьны Ругьу булан башлап, инсан амалларыгъыз булан тамамламагъа сюемисиз?
Сизин башыгъыздан оьтген бары да затлар бошуна гетип къалма ярамас!
Сизге Оьзюню Ругьун берген ва арагъызда аламатлар яратагъан Аллагь муну сиз Къанунну юрютегенигиз учун этеми яда сизге айтылгъан затгъа инангъаныгъыз учун этеми?
Ибрагьимни эсге алып къоюгъуз. Ону гьакъында Сыйлы Язывларда булай язылгъан чы: «Ибрагьим Аллагьгъа иман салды, шо саялы Аллагь ону къабул этди».
Сиз шу затны англап къоюгъуз: Аллагьгъа иман салагъанлар барысы да Ибрагьимни авлетлеридир!
Аллагь ят халкъланы оьзлени иманына гёре къабул этежеги Сыйлы Язывларда алданокъ билдирилген. Шогъар гёре Аллагь Ибрагьимге: «Бары да халкълагъа Аллагь сенден таба берекет берер», – деп ваъда этген.
Шо саялы да Аллагь Оьзюне иман салгъан Ибрагьимге берекет бергени йимик, О Оьзюне иман салагъанланы барысына да берекет берер.
Къанунну юрютмекге аркъа таяйгъанланы барысы да налатны тюбюндедир. Неге тюгюл де, Сыйлы Язывларда: «Къанунда язылгъан бары да затланы юрютмейгенлер барысы да налатлансынлар», – деп язылгъан.
Къанунну кютген деп, Аллагь биревню де къабул этмежеги ачыкъдыр. Неге тюгюл де, «имандан таба Аллагь къабул этгенлер яшап къалажакълар».
Къанун буса имангъа асасланмагъан. Онда язылгъан кюйде, «янгыз Къанунну бары да буйрукъларын гьар заман кютегенлер шо буйрукълар булан яшап къалажакъ».
Месигь муна шолай бизин Къанунну налатындан къутгъарды. Бизин учун О Оьзю налатланды. Неге тюгюл де, Сыйлы Язывларда: «Агъачгъа илинген налатлангъандыр», – деп язылгъан.
Шо саялы Аллагьны Ибрагьимге берген ваъдасы Иса Месигьден таба ят халкълар учун яшавгъа чыгъа, биз де оьзюбюзге ваъда этилген Аллагьны Ругьун имандан таба алабыз.
Къардашлар, мен сизге гьар гюнлюк яшавдан мисал гелтирейим. Гьатта инсанлар язып къоягъан разилешивню гери урмагъа ва огъар бир зат сама къошмагъа биревню де ихтияры ёкъ.
Ибрагьимге ва ону авлетине берилген ваъдалар булан да лап шолай болду. Тергев этигиз чи, Сыйлы Язывларда «авлетлерине» деп айтылмагъан, «авлетине» деп айтылгъан. «Авлети» буса Месигьдир.
Арадан дёрт юз отуз йыл гетип чыкъгъан Къанун Аллагь бегетген разилешивню гючюн тайдырып ва онда ваъда этилген затны ёкъ этип болмай.
Эгер варислик этмек ихтиярны Къанун бере болгъан буса, шону, озокъда, ваъда булан алып болмас эди. Аллагь буса шо ихтиярны Ибрагьимге Оьзюню ваъдасы булан савгъат этип берген.
Шолай болгъанда, Къанун не учун берилген дагъы? Къанун инсанланы гюнагьлары саялы да берилген. Ваъда оьзюнюки болгъан Ибрагьимни авлети гелгинче, Къанун иш гёрдю. Къанун арачы болгъан Мусаны кёмеклиги булан малайиклерден таба берилген.
Арачы эки якъны пайдаларын якълайгъанда тарыкълы бола. Аллагь буса бирдир.
Къанун Аллагь берген ваъдалагъа къаршы чыгъамы дагъы? Чыкъмай! Эгер бизге берилген Къанунну яшав бермеге гючю бар эди буса, Аллагь къабул этегенлик, гертилей де, Къанундан асылы болур эди.
Сыйлы Язывлар бютюн дюньяны гюнагьны къолунда есир этип токътагъан. Шоллукъда, Аллагь этген ваъда янгыз Иса Месигьге иман салгъанлагъа берилер.
Иманны вакътиси етгинче, гёзленген иман арагъа чыкъгъанча, Къанун бизин кирит уруп сакълай эди.
Месигь гелип, Аллагь бизин иманыбызгъа гёре къабул этгинче, Къанун бизин яшланы тарбиялавчусудай алып юрюп турду.
Амма иманны заманы гелди, бизге де тарбиялавчу дагъы тарыкъ тюгюл.
Иса Месигьге иман салмакълыгъыгъыз булан сиз Аллагьны авлетлери болдугъуз.
Сиз сувгъа чомдуртуп, оьзюгюзню Аллагьгъа тапшуртуп, Месигь булан бирлешип, барыгъыз да Ону булан бир болуп токътадыгъыз.
Не ягьуди, неде ят, не къул, неде азат, не эркек, неде къатын дагъы ёкъдур, неге тюгюл Иса Месигьге салгъан имандан таба сиз барыгъыз да бирсиз!
Эгер сиз Месигьники бусагъыз, сиз Ибрагьимни наслусу гьисапда Аллагь ваъда этген затланы варислерисиз.