Книга От Марка Cтих 18 | Параллельные места

Авзулары бардыр шо аллагьланы, амма сёйлемейдир; гёзлери бардыр шоланы, амма гёрмейдир. Къулакълары бардыр шо аллагьланы, амма эшитмейдир; танавлары бардыр шоланы, амма ийис билмейдир. Мен олагъа масаллар булан сёйлейгенимни себеби: Олар тынглап туражакълар – амма англамажакълар, къарап туражакълар – амма гёрмежеклер. Ёгъесе, олар товба этер эди ва оланы гюнагьлары гечилмеге болур эди. Бу халкъны янына барып айт: сиз тынглап туражакъсыз, амма англамажакъсыз; къарап туражакъсыз, амма гёрмежексиз.

Мен беш минг адамгъа беш экмекни пайлагъанда, къалгъан гесеклерден толтуруп, нече земгилни жыйгъаныгъыз эсигиздеми? – дей. – Он эки, – деп жавап берелер олар.

– Етти экмекни дёрт минг адамгъа пайлагъанда, къалгъан затдан нече земгилни толтуруп жыйдыгъыз? – деп сорай Иса. – Етти, – деп жавап берелер олар.

Шо заман Иса олагъа: – Неге сиз гьали де англамайсыз? – дей.

Иса якъчылары булан Байтсайдагъа геле. Онда къолун тийдирсин деп тилеп, Ону янына бир сокъур адамны гелтирелер.

Иса сокъурну къолундан тутуп, ону юртдан чыгъара. Сонг ону гёзлерине тюкюрюгюн тийдирип, ону уьстюне къолларын сала ва: – Гьеч зат гёремисен? – деп сорай.

Бу адам къарап: – Мен адамланы гёремен, олар тереклер йимик, тек олар юрюйлер, – дей.

Сонг Иса къолларын дагъы да ону гёзлерине сала. Бу адам гёзлерин ачып къарай. Ону гёзлери ачыла ва дагъы да къайтып яхшы гёреген бола.

Иса ону: – Уьюнге бар, амма юртгъа гирме, – деп йибере.

Мундан таба Иса якъчылары да булан бирге Филиппа Къайсарияны юртларына багъып бара. Ёлда О якъчыларына: – Адамлар Мени ким деп гьисап эте? – деп сорай.

– Бирлери Ягьия пайхаммар, башгъалары Илияс, биревюлери буса пайхаммарланы бириси деп гьисап эте, – деп жавап берелер якъчылары Огъар.

– Сиз Мен кимдир деп ойлашасыз? – деп сорай Иса олагъа. – Сен Месигьсен! – деп жавап бере Петер.

Оьзюню гьакъында гьеч биревге де сёйлемесин деп, Иса олагъа къатты кюйде бувара.