Книга От Луки Cтих 21 | Параллельные места

Сагъа, янгыз Сагъа къаршы гюнагь иш этдим мен, яманлыкъ да этдим Сен гёре туруп. Шо саялы да тюз гьукму чыгъарасан Сен, дуванынгда да тазасан Сен. Эгер де, Раббим, гюнагь ишлени санап турсанг Сен, ким токътап болар экен дагъы, Раббим? Шо заман дин къуллукъчуланы башчысы, уьст опуракъларын йыртып йиберип: – Бу Аллагьгъа къаршы капир затланы сёйлей! Бизге дагъы шагьатлар негер тарыкъдыр? Муна гьали эшитдигиз чи сиз Муну Аллагьгъа къаршы капир затланы сёйлейгенин! Ону булан бирче тепсиде олтургъанлар: «Гюнагьланы да гечеген Бу кимдир?» – деп ойлашмагъа башлайлар. – Сагъа: «Тёшегингни де алып бар», – деп айтгъан Адам кимдир? – деп сорайлар огъар. – Биз Сени таш урушгъа тутмагъа сюегенибиз яхшы ишлеринг саялы тюгюл, Сен капирлик этегенинг саялы. Инсан да болуп Оьзюнгню Аллагь этип гёрсетегенинг саялы, – деп жавап бере ягьудилер Огъар.

Оланы ойларын билип, Иса булай дей: – Сиз неге олай ойлашасыз?

Къайсы рагьатдыр: «Сени гюнагьларынгдан гечилди», – демекми, ёгъесе: «Туруп, юрюп йибер», – демекми?

Мени, Инсанны Уланыны, бу дюньяда гюнагьлардан гечмеге къудратым барны сиз гьали гёрежексиз, – деп жавап бере. Авруйгъан адамгъа буса: – Сагъа айтаман: туруп, ятывунгну да алып, уьюнге бар, – дей.

О шоссагьат бары да халкъны гёз алдында тура, ятывун да алып, Аллагьгъа шюкюр де эте туруп, уьюне гете.

Барысы да гьайран болуп къалалар ва Аллагьгъа макътав этелер. Къоркъгъан гьалында: – Бугюн биз бек гьайран ишлер гёрдюк, – дейлер.

Шондан сонг Иса ондан гете. О ясакъ жыягъан ерде олтургъан Левий деген ясакъчыны гёре ва огъар: – Гел, Мени артыма тюш! – дей.

Левий де туруп, бары да затын да къоюп, Ону булан гете.

Левий оьзюню уьюнде Иса учун бир уллу къонакълыкъ эте. Къонакъланы арасында бир хыйлы ясакъчылар ва оьзге адамлар да бола.

Фарисейлер ва дин алимлер буса Исаны якъчыларына: – Сиз неге ясакъчылар ва гюнагьлылар булан бирче олтуруп ашап-ичип турасыз? – деп сорай.

– Эмчи савлагъа тюгюл, аврувлагъа тарыкълы бола.

Мен муъминлени тюгюл, гюнагьлыланы товба этмеге чакъырмакъ учун гелгенмен, – деп жавап бере Иса олагъа.

Олар шо заман Исагъа: – Ягьияны якъчылары чакъда-чакъда ораза туталар ва дуа этелер. Фарисейлени якъчылары да шолай этелер, Сеникилер буса ашап-ичип туралар, – дейлер.