Книга Св. Евангелие от Матфея Cтих 4

не тако же будет в вас: но иже аще хощет в вас вящший быти, да будет вам слуга: и иже аще хощет в вас быти первый, буди вам раб: Болий же в вас да будет вам слуга: иже бо вознесется, смирится: и смиряяйся вознесется. не тако же будет в вас: но иже аще хощет в вас вящший быти, да будет вам слуга: и иже аще хощет в вас быти старей, да будет всем раб: Вы же не тако: но болий в вас, да будет яко мний: и старей, яко служай. Смиритеся убо под крепкую руку Божию, да вы вознесет во время:

и иже аще приимет отроча таково во имя мое, мене приемлет:

а иже аще соблазнит единаго малых сих верующих в мя, уне есть ему, да обесится жернов оселский на выи его, и потонет в пучине морстей.

Горе миру от соблазн: нужда бо есть приити соблазном: обаче горе человеку тому, имже соблазн приходит.

Аще ли рука твоя или нога твоя соблажняет тя, отсецы ю и верзи от себе: добрейше ти есть внити в живот хрому или бедну, неже две руце и две нозе имущу ввержену быти во огнь вечный:

и аще око твое соблажняет тя, изми е и верзи от себе: добрейше ти есть со единем оком в живот внити, неже две оце имущу ввержену быти в геенну огненную.

Блюдите, да не презрите единаго малых сих: глаголю бо вам, яко ангели их на небесех выну видят лице Отца моего небеснаго.

Прииде бо Сын человеческий спасти погибшаго.

Что вам мнится? Аще будет некоему человеку сто овец, и заблудит едина от них: не оставит ли девятьдесят и девять в горах и шед ищет заблуждшия?

и аще будет обрести ю, аминь глаголю вам, яко радуется о ней паче, неже о девятидесятих и девяти не заблуждших.

Тако несть воля пред Отцем вашим небесным, да погибнет един от малых сих.

Аще же согрешит к тебе брат твой, иди и обличи его между тобою и тем единем: аще тебе послушает, приобрел еси брата твоего:

аще ли тебе не послушает, поими с собою еще единаго или два, да при устех двою или триех свидетелей станет всяк глагол: