Книга Св. Евангелие от Матфея Cтих 19

Просите, и дастся вам: ищите, и обрящете: толцыте, и отверзется вам: и вся, елика аще воспросите в молитве верующе, приимете. сего ради глаголю вам: вся елика аще молящеся просите, веруйте, яко приемлете: и будет вам: аще пребудете во мне и глаголы мои в вас пребудут, егоже аще хощете, просите, и будет вам. и в тои день мене не воспросите ничесоже. аминь, аминь глаголю вам, яко елика аще чесо просите от оца во имя мое, даст вам. Аще же кто от вас лишен есть премудрости, да просит от дающаго Бога всем нелицеприемне и не поношающаго, и дастся ему. Мужие такожде, вкупе живуще со своими женами по разуму, яко немощнейшу сосуду женскому воздающе честь, яко и снаследницы благодатныя жизни, во еже не прекращатися молитвам вашым. и егоже аще просим, приемлем от него, яко заповеди его соблюдаем и угодная пред ним творим.

идеже бо еста два или трие собрани во имя мое, ту есмь посреде их.

Тогда приступль к нему петр рече: Господи, колькраты аще согрешит в мя брат мой, и отпущу ли ему до седмь крат?

Глагола ему Иисус: не глаголю тебе: до седмь крат, но до седмьдесят крат седмерицею.

Сего ради уподобися царствие небесное человеку царю, иже восхоте стязатися о словеси с рабы своими.

Наченшу же ему стязатися, приведоша ему единаго должника тмою талант:

не имущу же ему воздати, повеле и господь его продати, и жену его, и чада, и вся, елика имеяше, и отдати.

Пад убо раб той, кланяшеся ему, глаголя: господи, потерпи на мне, и вся ти воздам.

Милосердовав же господь раба того, прости его и долг отпусти ему.

Изшед же раб той, обрете единаго клеврет своих, иже бе должен ему стом пенязь: и емь его давляше, глаголя: отдаждь ми, имже еси должен.

Пад убо клеврет его на нозе его, моляше его, глаголя: потерпи на мне, и вся воздам ти.

Он же не хотяше, но вед всади его в темницу, дондеже воздаст должное.

Видевше же клеврети его бывшая, сжалиша си зело и пришедше сказаша господину своему вся бывшая.