Книга Св. Евангелие от Иоанна Cтих 18

И хотящь его убити, убояся народа, зане яко пророка его имеяху. и совещаша, да Иисуса лестию имут и убиют: Бе же пасха и опресноцы по двою днию: и искаху архиерее и книжницы, како его лестию емше убиют: И хождаше Иисус по сих в галилеи: не хотяше бо во иудеи ходити, яко искаху его иудее убити. Глаголаху убо нецыи от иерусалимлян: не сей ли есть, егоже ищут убити? вем, яко семя авраамле есте: но ищете мене убити, яко слово мое не вмещается в вы: ныне же ищете мене убити, человека, иже истину вам глаголах, юже слышах от Бога: сего авраам несть сотворил: аз и Отец едино есма. Отвещаша ему иудее, глаголюще: о добре деле камение не мещем на тя, но о хуле, яко ты, человек сый, твориши себе Бога. От того убо дне совещаша, да убиют его.

Отвеща же Иисус и рече им. аминь, аминь глаголю вам, не может Сын творити о себе ничесоже, аще не еже видит Отца творяща: яже бо он творит, сия и Сын такожде творит.

Отец бо любит Сына, и вся показует ему, яже сам творит: и больша сих покажет ему дела, да вы чудитеся.

Якоже бо Отец воскрешает мертвыя и живит, тако и Сын, ихже хощет, живит.

Отец бо не судит никомуже, но суд весь даде Сынови,

да вси чтут Сына, якоже чтут Отца. а иже не чтит Сына, не чтит Отца пославшаго его.

Аминь, аминь глаголю вам, яко слушаяй словесе моего и веруяи пославшему мя имать живот вечныи, и на суд не приидет, но преидет от смерти в живот.

Аминь, аминь глаголю вам, яко грядет час, и ныне есть, егда мертвии услышат глас Сына Божия, и услышавше оживут.

Якоже бо Отец имать живот в себе, тако даде и Сынови живот имети в себе.

и область даде ему и суд творити, яко Сын человечь есть.

Не дивитеся сему: яко грядет час, в оньже вси сущии во гробех услышат глас Сына Божия,

и изыдут сотворшии благая в воскрешение живота, а сотворшии злая в воскрешение суда.

Не могу аз о себе творити ничесоже. Якоже слышу, сужду, и суд мой праведен есть, яко не ищу воли моея, но воли пославшаго мя Отца.