Ӕмбӕрзӕн бауаф ӕрвхуыз, сырх ӕмӕ сӕнтсырх ӕндӕхтӕй ӕмӕ уӕздан виссонӕй; ӕмбӕрзӕныл херувимтӕ хъуамӕ уой нывӕфтыдӕй.
Ӕмӕ йӕ ӕрцауындз сыгъзӕриндоны тылд цыппар акъаци цӕджындзыл. Цӕджындзтыл хъуамӕ уа сыгъзӕрин къӕпсыртӕ, сӕ быны – ӕвзист бынӕвӕрӕнтӕ.
Ӕмбӕрзӕн ӕрцауындз къӕпсыртыл, ӕмӕ фӕсӕмбӕрзӕнмӕ бахӕсс фидыды Чырын. Ӕмбӕрзӕн сыгъдӕг бынат фӕхицӕн кӕндзӕн Иууылсыгъдӕг бынатӕй.
Иууылсыгъдӕг бынаты фидыды Чырыныл ӕрӕвӕр йӕ сӕр.
Фынг ӕрӕвӕр ӕддӕрдыгӕй, ӕмбӕрзӕны раз; фынджы акомкоммӕ та, Цатыры хуссарварс, ӕрӕвӕр рухсгӕнӕн. Фынг та сӕвӕр Цатырӕн йӕ цӕгатварс.
Цатырмӕ бацӕуӕны ӕмбӕрзӕн бауаф ӕрвхуыз, сырх ӕмӕ сӕнтсырх ӕндӕхтӕй ӕмӕ уӕздан виссонӕй нывӕфтыдтимӕ.
Ӕмбӕрзӕнӕн сараз фондз цӕджындзы акъацийӕ, ӕмӕ сӕ сӕвдул сыгъзӕриндоны; сӕ къӕпсыртӕ хъуамӕ уой сыгъзӕринӕй; уыцы цӕджындзтӕн джиппы рауадз фондз бынӕвӕрӕны ӕрхуыйӕ.