Дзӕвгар рӕстӕг цыдыстӕм сындӕг, ӕмӕ тыххӕйты бахӕццӕ стӕм Книдмӕ. Дымгӕ нӕ размӕ цӕуын кӕй нӕ уагъта, уымӕ гӕсгӕ ахызтыстӕм Салмоны рӕзты ӕмӕ, Криты чъылдыммӕ дымгӕйӕ бамбӕхсгӕйӕ, цыдыстӕм дарддӕр.
«Хорз адӕм, ӕз уынын, фӕндагыл нӕ баййафдзӕн бӕллӕх, ӕмӕ стыр зиан ӕрцӕудзӕн ӕрмӕст уӕзӕгтыл ӕмӕ науыл нӕ, фӕлӕ нӕхиуыл дӕр».
Наулӕууӕн зымӕгиуатӕн кӕй нӕ бӕззыд, уымӕ гӕсгӕ сӕ фылдӕр фӕндон хастой, цӕмӕй нау гӕнӕн ӕмӕ амалӕй бацӕуа критаг наулӕууӕн Финикмӕ, ӕмӕ зымӕг арвитӕм уым. Уыцы наулӕууӕн кӕсы хуссар-ныгуылӕнмӕ ӕмӕ цӕгат-ныгуылӕнмӕ.
Хуссайраг уадымс куы радымдта, уӕд ӕнхъӕлдтой ӕмӕ сӕ цы фӕндыди, уый сӕ баййӕфта; систой науӕнгуыр ӕмӕ ацыдысты Криты былгӕрӕтты рӕзты.