Раббим мени ярымдыр, беклигимдир, мени азат этивчюмдюр. Аллагьым мени якълавумдур: Олдур мени аркъатаявум, Олдур мени къалкъаным, къутгъарылывумну къудратыдыр, къамалып токътайгъан еримдир.
Къыйын болгъанда Раббиме чакъырыв этдим мен, Аллагьны да атын тутуп сёйледим. Ол да кёклерден туруп мени тавушумну эшитди, мени агь урувум да Огъар етишди.
Неге тюгюл де, балагь гелген гюн чатырында яшырып сакълар Ол мени, Оьзю турагъан ерни инг де сырлы еринде яшырып къояр мени, яргъа гётерип къояр мени.
Мунгайып тура ичимде жаным мени. Шо саялы да Ёрдан топурагъындан, Гьермон ва Мицар тавлардан туруп эсге алып тураман мен Сени.
Аллагьны гьакъында ойлашагъанда, агь уруп йиберемен мен; ойгъа тюшсем, гьалсыз болуп токътай ругьум мени.