Къоркъугъуз чу Раббибизден, Ону халкъы, неге тюгюл де тарчыкълыгъы болмас Ондан къоркъагъанланы.
Байлар да тарчыкъ, ач болуп къалагъан кюй бола, амма Раббибизни излейгенлер бир ниъматдан да магьрюм къалмас.
Сенсендир Исрайылны Къойчусу! Сенсендир Юсупну наслусун къойланыдай алып юрюйген! Къулакъ ас чы Сен. Сенсендир Гьерубимлени уьстюнде олтургъан! Ефремни, Буньяминни, Манассияны наслуларына нюрленген гьалынгда чыгъып къал чы Сен. Къудратынгны гёрсет чи, бизин къутгъарма да гел чи Сен.
Мен яхшы къойчуман. Яхшы къойчу оьзюню къойлары учун жанын да аямай.
Ялгъа тутулгъан адам герти къойчу тюгюл. Къойлар онуки тюгюл. Бёрюню гелегенин гёргенде, о къойланы къоюп къача. Бёрю де, къойланы тутуп, паралай.
Аллагьым да Иса Месигьден таба сизин бары да тарчыкъларыгъызны Оьзюню макътавлу байлыкъларындан толумлашдырар.
Оьзюню къаны булан даимлик разилешивню бегетген, къойланы да уллу Къойчусу болгъан Раббибиз Исаны оьлюмден тирилтген, парахатлыкъ береген Аллагь гьар-бир яхшы ишде Оьзюню сюйгенин яшавгъа чыгъармакъ учун, сизин тюз ёлгъа салсын дагъы. Оьзюне гьар даим де макътавлар болгъур Раббибиз Иса Месигьден таба О бизде Оьзюню кепине гелеген затны яратсын дагъы. Амин.
Сиз, адашгъан къойлар йимик, ёлугъузну тас этген эдигиз. Гьали буса сиз жанларыгъызны Къойчусуну ва Сакълавчусуну янына къайтып гелдигиз.
Баш Къойчубуз Иса гелип гёрюнген заманда, сиз сёнмейген бир макътавлу таж алажакъсыз.