Аллагьны къулу болгъан Мусаны дуасы. Раббим! Наслудан наслугъа аркъатаявубузсандыр Сен.
Тавлар яралгъанча да алдын, Сен ер юзюн, аламны яратгъанча да, асрудан асругъа ерли де Аллагьсандыр Сен.
Хумгъа дёндюрюп къоясан Сен инсанны. «Къайтыгъыз, инсанлар!» – деп де айтасан.
Неге тюгюл де, тюнегюнгю оьтген гюн йимикдир минг йыл, гечеги бир сагьат йимикдир Сени гёз алдынгда.
Ташгъындай алып гетип къаласан Сен оланы. Олар бир тюш йимикдир, эртен оьсюп, эртен чечекленип, яшылланып, ахшам буса тамурундан юлкъунуп, къуруп къалагъан бир от йимикдир.
Ташгъындай алып гетип къаласан Сен оланы. Олар бир тюш йимикдир, эртен оьсюп, эртен чечекленип, яшылланып, ахшам буса тамурундан юлкъунуп, къуруп къалагъан бир от йимикдир.
Неге тюгюл де, ёкъ болуп къала турабыз къазапланывунгдан биз, бек ачувланмакълыгъынгдан да эпсиз къоркъунч гьалгъа тюшюп къалып турабыз биз.
Жинаятчылыкъларыбызны алдынга салып къойдунг Сен, сырлы гюнагьларыбыз да бетингни нюрюню алдында тура Сени.
Сени къазапланывунг булан оьтюп тура бары гюнлерибиз бизин. Агь ура туруп тамамлайбыз оьмюрюбюзню де биз.
Оьмюрюбюз етмишге чыгъа бизин, бираз къаттыланыки де – сексенге. Шоланы да инг тизив вакътиси загьмат булан аврувдур, неге тюгюл де нече де чалт гетип къала оьмюр, биз де турабыз учуп.
Амма Сени алдынгдагъы къоркъув Сендеги къазапланывну алдын алып токътар.
Биз гьакъыллы юрекге ес болсун учун, гюнлерибизни гьисабын юрютме уьйрет чи Сен бизин.
Къайтып къал чы, Раббим! Къачан болгъанча булай турарсан дагъы? Языкъсын чы къулларынга.
Бары гюнлерибизде биз сююнюп-къуванып болсун учун, тез тойдуруп къой чу зор сюювюнгден бизин.
Нечакъы бизин йыгъып тургъан гюнлеринг учун, нечакъы балагьлар гёрюп тургъан йылларыбыз учун, шончакъы шатландырып къой чу бизин.
Къулларынга ишлерингни, оланы наслуларына макътавлугъунгну да гёрсетип къой чу.
Яхшы гёзден къара чы, Раббибиз Аллагь, бизге. Къолларыбыз этеген ишни де беклешдирип къой чу, къолларыбыз этеген ишни беклешдирип къой чу.
Неге тюгюл де, бары да инсанлар гюнагь иш этген ва Аллагьны нюрюню макътавлугъундан магьрюм къалгъан.