Книга Деяния св. Апостолов Cтих 4

Савл же озлобляше церковь, в домы входя, и влачя мужы и жены, предаяше в темницу. И аз рех: Господи, сами ведят, яко аз бех всаждая в темницу и бия по сонмищих верующыя в тя, Аз убо мнех, яко подобает ми многа сопротивна противу имене Иисуса назореа сотворити: еже и сотворих во иерусалиме, и многи от святых аз в темницах затворях, власть от архиерей приемь: убиваемым же им прилагах совет: и на всех сонмищих множицею мучя их, принуждах хулити: преизлиха же враждуя на них, гонях даже и до внешних градов. по ревности гоних церковь Божию, по правде законней быв непорочен. бывша мя иногда хульника и гонителя и досадителя: но помилован бых, яко неведый сотворих в неверствии:

якоже и архиерей свидетелствует ми и вси старцы: от нихже и послания приемь к живущым в дамасце братиям, идях привести сущыя тамо связаны во иерусалим, да мучатся.

Бысть же ми идущу и приближающуся к дамаску в полудне, внезапу с небесе облиста свет мног окрест мене.

Падох же на землю и слышах глас глаголющь ми: савле, савле, что мя гониши?

Аз же отвещах: кто еси, Господи? рече же ко мне: аз есмь Иисус назорей, егоже ты гониши.

Со мною же сущии свет убо видеша и пристрашни быша, гласа же не слышаша глаголющаго ко мне.

Рекох же: что сотворю, Господи? Господь же рече ко мне: востав иди в дамаск, и тамо речется ти о всех, яже вчинено ти есть творити.

И якоже не видех от славы света онаго, за руку ведомь от сущих со мною, внидох в дамаск.

Ананиа же некий, муж благоговеин по закону, свидетелствован от всех живущих в дамасце иудей,

пришед ко мне и став рече ми: савле брате, прозри. И аз в той час воззрех нань.

Он же рече ми: Бог отец наших изволи тя разумети хотение его, и видети првдника, и слышати глас от уст его:

яко будеши ему свидетель у всех человеков о сих, яже видел еси и слышал:

и ныне что медлиши? востав крестися и омый грехи твоя, призвав имя Господа Иисуса.