Книга Деяния св. Апостолов Cтих 24

началника же жизни убисте: егоже Бог воскреси от мертвых, емуже мы свидетелие есмы. но и за ны, имже хощет вменитися, верующым в воскресившаго Иисуса Христа Господа нашего из мертвых, юже содея о Христе, воскресив его от мертвых и посадив одесную себе на небесных, спогребшеся ему крещением: о немже и совостасте верою действия Бога, воскресившаго его из мертвых. Бог же мира, возведый из мертвых пастыря овцам великаго кровию завета вечнаго, Господа нашего Иисуса Христа, иже его ради веруете в Бога воздвигшаго его из мертвых и славу ему давша, яко да вера ваша и упование будет на Бога.

Давид бо глаголет о нем: предзрех Господа предо мною выну, яко о десную мене есть, да не подвижуся:

сего ради возвеселися сердце мое, и возрадовася язык мой: еще же и плоть моя вселится на уповании,

яко не оставиши души моея во аде, ниже даси прпдбному твоему видети истления:

сказал ми еси пути живота: исполниши мя веселия с лицем твоим.

Мужие братие, достоит рещи с дерзновением к вам о патриарсе давиде, яко и умре и погребен бысть, и гроб его есть в нас даже до дне сего:

пророк убо сый и ведый, яко клятвою клятся ему Бог от плода чресл его по плоти воздвигнути Христа и посадити его на престоле его,

предвидев глагола о воскресении Христове, яко не оставися душа его во аде, ни плоть его виде истления.

Сего Иисуса воскреси Бог, емуже вси мы есмы свидетелие.

Десницею убо Божиею вознесеся, и обетование святаго Духа приемь от Отца, излия сие, еже вы ныне видите и слышите.

Не бо давид взыде на небеса, глаголет бо сам: рече Господь Господеви моему: седи о десную мене,

дондеже положу враги твоя подножие ног твоих.

Твердо убо да разумеет весь дом Израилев, яко и Господа и Христа его Бог сотворил есть, сего Иисуса, егоже вы распясте.