Мени оьлтюрме деп айланагъанлар илыгъып, биябур болуп къалсын дагъы, артгъа багъып къачсын дагъы, хорлукъгъа тюшюп къалсын дагъы магъа яманлыкъ этме хыял этегенлер.
Елни алдындагъы чанггъа ошап къалсын дагъы олар, къувалап къойсун дагъы оланы Раббибизни Малайиги.
Къарангы, тайгъакъ болуп къалсын дагъы оланы ёлу, гьызарлап юрюсюн дагъы оланы Раббибизни Малайиги.
Неге тюгюл де, гьеч бир себепсиз тор салып, гьеч бир себепсиз къую да къазып токътадылар магъа олар.
Хапарсыз дагъылыв гелип къалсын дагъы олагъа, магъа деп яшырып токътагъан торуна да, оьзю тутулуп къалсын дагъы; оьзю тюшюп къалсын дагъы шондагъы дагъылывгъа.
Яманны салып къой душманымны уьстюне, айыплайгъанны да тургъузуп къой ону онг янында.
Дувангъа чыкъгъанда, айыплы болуп къалсын дагъы, дуасы да бир гюнагьгъа айланып къалсын дагъы ону.
Оьмюрю къысгъа болуп къалсын дагъы ону, къуллугъун да башгъа гиши тутсун дагъы ону.
Авлетлери етим, къатыны да тул болуп къалсын дагъы ону.
Оьзлени чёкген уьйлеринден ареклерде садагъа тилей туруп, къыдырып айлана, тиленчилик юрюте къалсынлар дагъы оланы яшлары.
Бары затын чыгъарып алсын дагъы оьзюне борчгъа берген адам ону, къазангъанын талап къойсун дагъы ятлар да ону.
Гьеч языкъсынагъан болмасын дагъы огъар, рагьму этеген де болмасын дагъы ондан къалгъан етимлеге де.
Оьлюмге тарылып къалсын дагъы наслусу ону; дагъы наслугъа чыгъып да битгенче, ёкъ болуп къалсын дагъы оланы аты.
Раббибизни алдында эсгерилип къалсын дагъы аталарыны жинаятчы ишлери, анасыны гюнагьлары да гьеч унутулмай къалсын дагъы ону.
Гьеч таймасын дагъы Раббибизни алдындан оланы гюнагьлары. Ата-анасы булан байлавлу эсделикни буса ёкъ этип къойсун дагъы Ол.
Давут да булай айтды: Оланы ашав-ичивлери оьзлер учун тузакъ, къапгъун, сюрюнеген таш ва жаза болуп къалсын.
Гёрмейген болсун учун, оланы гёзлерин къарангылыкъ япсын. Оланы аркъалары даимге бюгюлюп къалсын.