Книга Св. Евангелие от Иоанна Cтих 17

Народи же глаголаху: сей есть Иисус пророк, иже от назарета галилейска. и ищуще его яти, убояшася народа, понеже яко пророка его имеяху. Прият же страх всех, и славляху Бога, глаголюще: яко пророк велий воста в нас, и яко посети Бог людей своих. Глагола ему жена: господи, вижу, яко пророк еси ты: человецы же видевше знамение, еже сотвори Иисус, глаголаху, яко сей есть воистинну пророк грядый в мир. Мнози же от народа слышавше слово, глаголаху: сей есть воистинну пророк. Паки же вопрошаху его и фарисее, како прозре. Он же рече им: брение положи мне на очи, и умыхся, и вижу.

Не яша убо веры иудее о нем, яко слеп бе и прозре, дондеже возгласиша родителя того прозревшаго

и вопросиша я, глаголюще: сей ли есть сын ваю, егоже вы глаголете, яко слеп родися? како убо ныне видит?

Отвещаста же им родителя его и реста: вемы, яко сей есть сын наю и яко слеп родися:

како же ныне видит, не вемы: или кто отверзе ему очи, мы не вемы: сам возраст имать, самого вопросите, сам о себе да глаголет.

Сия рекоста родителя его, яко боястася жидов: уже бо бяху сложилися жидове, да, аще кто его исповесть Христа, отлучен от сонмища будет:

сего ради родителя его рекоста, яко возраст имать, самого вопросите.

Возгласиша же вторицею человека, иже бе слеп, и реша ему: даждь славу Богу: мы вемы, яко человек сей грешен есть.

Отвеща убо он и рече: аще грешен есть, не вем: едино вем, яко слеп бех, ныне же вижу.

Реша же ему паки: что сотвори тебе? како отверзе очи твои?

Отвеща им: рекох вам уже, и не слышасте: что паки хощете слышати? еда и вы ученицы его хощете быти?

Они же укориша его и реша ему: ты ученик еси того: мы же моисеовы есмы ученицы:

мы вемы, яко моисеови глагола Бог: сего же не вемы, откуду есть.