Книга Первое послание Иоанна Cтих 1

Елицы же прияша его, даде им область чадом Божиим быти, верующым во имя его, иже не от крове, ни от похоти плотския, ни от похоти мужеския, но от Бога родишася. Душы вашя очистивше в послушании истины духом, в братолюбие нелицемерно, от чиста сердца друг друга любите прилежно, порождени не от семене истленна, но неистленна, словом живаго Бога и пребывающа во веки. Кто есть лживый, точию отметаяйся, яко Иисус несть Христос? Сей есть антихрист, отметаяйся Отца и Сына. Всяк отметаяйся Сына, ни Отца имать: а исповедаяй Сына, и Отца имать.

О сем вемы, яко любим чада Божия, егда Бога любим и заповеди его соблюдаем.

Сия бо есть любы Божия, да заповеди его соблюдаем: и заповеди его тяжки не суть.

Яко всяк рожденный от Бога побеждает мир: и сия есть победа, победившая мир, вера наша.

Кто есть побеждаяй мир, токмо веруяй, яко Иисус есть Сын Божий?

Сей есть пришедый водою и кровию и духом, Иисус Христос, не водою точию, но водою и кровию: и дух есть свидетелствуяй, яко дух есть истина.

Яко трие суть свидетелствующии на небеси, Отец, слово и святый дух: и сии три едино суть.

И трие суть свидетелствующии на земли, дух и вода и кровь: и трие во едино суть.

Аще свидетелство человеческое приемлем, свидетелство Божие более есть: яко сие есть свидетелство Божие, еже свидетелствова о Сыне своем.

Веруяй в Сына Божия имать свидетелство в себе: не веруяй Богови лжа сотворил есть его, яко не верова во свидетелство, еже свидетелствова Бог о Сыне своем.

И сие есть свидетелство, яко живот вечный дал есть нам Бог, и сей живот в Сыне его есть.

Имеяй Сына Божия имать живот: а не имеяй Сына Божия живота не имать.

Сия писах вам верующым во имя Сына Божия, да весте, яко живот вечный имате, и да веруете во имя Сына Божия.