Аллагьым, Аллагьым! Не саялы ташлап къойдунг мени? Кёп арекдесен Сен, агь уруп сёйлейген сёзлерим де къутгъарылыв гелтирмей магъа.
Аллагьым! Гюндюзлер чакъырыв этемен – гьеч къулакъасмайсан Сен магъа, гечелер де чакъырыв этемен – гьеч рагьатлыкъ ёкъ магъа.
Амма Сен сыйлысан чы, Сенсен чи тахда олтургъан. Сагъадыр Исрайыл макътав этеген.
Сагъадыр умут этип тургъан аталарыбыз; умут этип тургъанлар, Сен де оланы азат этип турдунг.
Чакъырыв эте эдилер олар Сагъа, къутгъарылып къала эдилер олар да; Сагъа эдилер умут этеген олар, гьеч илыкъма да тюшмей эди олагъа.
Мен бусам инсан тюгюл, хуртмандыр; адамланы хорлаву, халкъ да жиргенч гёреген затмандыр.
Мени гёрюп турагъанланы барысы да мени мысгъыллап туралар; башларын силлей туруп, авзулары булан булай сёйлеп туралар:
«Раббиге эди ол аркъатаягъан; азат этсин дагъы ону. Рабби рази къала болгъан сонг, Рабби Оьзю къутгъарма да къутгъарсын дагъы ону».
Амма анамны къарнындан мени чыгъаргъан, ону кёкюрегинде мени якълагъан Сен эдинг.
Анамны къурсагъындан берли де Сагъа депдир мен къалгъаным; тувмадан берли де Сенсендир мени Аллагьым.
Арекге тайып къалма дагъы менден; неге тюгюл де къайгъы ювукъдадыр, кёмекчим буса ёкъдур.
Душманларым бугъалар йимик къуршап алып туралар мени; Башан деген топуракъдагъы гючлю бугъалар да аралап туралар мени.
Гьавгъа деп гьазирленген, къычырагъан арсландай авзуларын да ачып токътагъанлар олар магъа.
Сувдай агъылып гетди яшавум мени; бары сюеклерим де тёгюлюп гетди мени; юрегим де балавуздай ирип гетди ичимде.
Чыны савутну гесегидей къуруп къалды мени гючюм-къуватым, хырданыма ябушуп къалды тилим мени. Сен де къабурдагъы чанггъа айландырып къойдунг мени.
Неге тюгюл де, итлер аралап къойдулар мени; кёп санавда яманлар да къуршап алдылар мени; къолларыма, бутларыма чанчдылар мени.
Бары сюеклеримни санап болур эдим мен. Мени гёрюп, тамашагъа йимик къарап токътагъанлар олар.
Опуракъларымны оьз арасында пайладылар, абамны буса чёп салып алдылар олар.
Амма Сен, Раббим, менден ареклеге чыгъып къалма дагъы. Къудратым мени! Магъа кёмекге алгъаса дагъы Сен.
Къылычдан къутгъар дагъы мени, итлерден де азат эт дагъы биргине-бир жанымны.
Арсланны авзундан азат эт дагъы мени; къыр бугъаланы мююзлеринден де сакъла дагъы мени.
Мен къардашларыма Сени атынгны айтажакъман ва Сени халкъынг жыйылгъанда, Сагъа макътав этежекмен.
Раббибизден къоркъагъанлар алгъыш этсин дагъы Огъар! Якъубну бары да наслулары макътав этсин дагъы Огъар! Исрайылны бары да наслулары гьюрмет этсин дагъы Огъар!
Неге тюгюл де, эсгик гёрмеди, гери урмады Раббибиз азап чегегенни ярлысын. Юзюн яшырып турмады ондан, Оьзюню атын тутуп чакъырыв этгенде, Раббибиз эшитди ону.
Раббибизни гьакъындадыр уллу жыйынлардагъы мени макътавларым; ваъдаларымны да етишдирермен Ондан къоркъагъанланы алдында.
Ашап-тоюп къалажакълар пакъырлар; Раббибизни ахтарагъанлар макътав этип туражакълар Огъар. Юреклеригизде гьар даим де яшап къалсынлар дагъы.
Бютюн ер юзюнде Раббибизни эсге алмагъан, Огъар бакъмагъан гьеч ер къалмас. Бары халкълар да Ону алдында сужда къылып турарлар.
Неге тюгюл де, Раббибизникидир гьакимлик; Олдур халкъланы уьстюнде гьакимлик этип турагъан.
Дюньяны бары да байлары ашап, сужда къылып турарлар; къара къабургъа гирегенлени де, оьзлени жанларын сав сакълап болмайгъанланы да барысы да Ону алдында тобукъдан турарлар.
Наслулар къуллукъ этип турар Раббибизге, гележек наслулагъа хабарлар Ону гьакъында.
Энниден сонг туважакълагъа: «Яшавгъа чыгъарды Ол бу затны», – деп де айта туруп, Раббибизни муъминлиги гьакъда билдирерлер олар.
Оьзюню даражасына етишмек учун, Месигь бары да бу азапланы чекмеге герек тюгюлмю эди дагъы? – деп сорай.
Демек, мен арагъыздан Исагъа иман салгъанланы жыйыныны ёлбашчыларына сёйлеймен. Мен де шолай ёлбашчыман, Месигьни азапларыны шагьатыман ва Ону ачыкъ болажакъ макътавлугъуна ортакъчы болажакъман.
Шо заман огъар сужда этмеге деп, аякъларыны алдында баш урдум. О буса магъа: – Шолай этме! Сен де, Исагъа гьалал къуллукъ этеген иман къардашларынг да йимик, мен де Аллагьны бир къуллукъчусуман. Аллагьгъа сужда эт! Аллагьны атындан сёйлемекни мурады Исаны гьакъында шагьатлыкъ этмекдир, – деп айтды.