Книга Первое послание Иоанна Cтих 2

не приясте бо духа работы паки в боязнь, но приясте духа сыноположения, о немже вопием: Авва Отче. Аще же чада, и наследницы: наследницы убо Богу, снаследницы же Христу, понеже с ним страждем, да и с ним прославимся. Мы же вси откровенным лицем славу Господню взирающе, в тойже образ преобразуемся от славы в славу, якоже от Господня духа. иже преобразит тело смирения нашего, яко быти сему сообразну телу славы его, по действу еже возмогати ему и покорити себе всяческая. егда же Христос явится, живот ваш, тогда и вы с ним явитеся в славе. имиже честная нам и великая обетования даровашася, да сих ради будете божественнаго причастницы естества, отбегше, яже в мире, похотныя тли: И ныне, чадца, пребывайте в нем, да егда явится, имамы дерзновение и не посрамимся от него в пришествии его.

И всяк имеяй надежду сию нань, очищает себе, якоже он чист есть.

Всяк творяй грех, и беззаконие творит: и грех есть беззаконие.

И весте, яко он явися, да грехи нашя возмет, и греха в нем несть.

Всяк, иже в нем пребывает, не согрешает: всяк согрешаяй не виде его, ни позна его.

Чадца, никтоже да льстит вас. Творяй правду праведник есть, якоже он праведен есть.

Творяй грех от диавола есть, яко исперва диавол согрешает. Сего ради явися Сын Божий да разрушит дела диаволя.

Всяк рожденный от Бога греха не творит, яко семя его в нем пребывает: и не может согрешати, яко от Бога рожден есть.

Сего ради явлена суть чада Божия и чада диаволя: всяк не творяй правды несть от Бога, и не любяй брата своего.

Яко се есть завещание, еже слышасте исперва, да любим друг друга,

не якоже каин от лукаваго бе и закла брата своего. И за кую вину закла его? Яко дела его лукава беша, а брата его праведна.

Не чудитеся, братие моя, аще ненавидит вас мир.

Мы вемы, яко преидохом от смерти в живот, яко любим братию: не любяй бо брата пребывает в смерти.