Книга Первое послание Иоанна Cтих 7

не мните, яко приидох разорити закон, или пророки: не приидох разорити, но исполнити. Заповедь новую даю вам, да любите друг друга: якоже возлюбих вы, да и вы любите себе: Вы убо еже слышасте исперва, в вас да пребывает: аще в вас пребудет, еже исперва слышасте, и вы в Сыне и Отце пребудете. Возлюбленнии, ныне чада Божия есмы, и не у явися, что будем: вемы же, яко, егда явится, подобни ему будем, ибо узрим его, якоже есть. Яко се есть завещание, еже слышасте исперва, да любим друг друга, И ныне молю тя, госпоже, не яко заповедь пишу тебе нову, но юже имамы исперва, да любим друг друга. И сия есть любы, да ходим по заповедем его. Сия есть заповедь, якоже слышасте исперва, да в ней ходите:

Паки заповедь нову пишу вам, еже есть поистинне в нем и в вас: яко тма мимоходит и свет истинный сей уже сияет.

Глаголяй себе во свете быти, а брата своего ненавидяй, во тме есть доселе.

Любяй брата своего во свете пребывает, и соблазна в нем несть.

А ненавидяй брата своего во тме есть, и во тме ходит, и не весть, камо идет, яко тма ослепи очи ему.

Пишу вам, чадца, яко оставляются вам греси имене его ради.

Пишу вам, отцы, яко познасте безначалнаго. Пишу вам, юноши, яко победисте лукаваго. Пишу вам, дети, яко познасте Отца.

Писах вам, отцы, яко познасте исконнаго: писах вам, юноши, яко крепцы есте, и слово Божие в вас пребывает, и победисте лукаваго.

Не любите мира, ни яже в мире: аще кто любит мир, несть любве Отчи в нем:

яко все, еже в мире, похоть плотская и похоть очима и гордость житейская, несть от Отца, но от мира сего есть.

И мир преходит, и похоть его, а творяй волю Божию пребывает во веки.

Дети, последняя година есть. И якоже слышасте, яко антихрист грядет, и ныне антихристи мнози быша, от сего разумеваем, яко последний час есть.

От нас изыдоша, но не беша от нас: аще бы от нас были, пребыли убо быша с нами: но да явятся, яко не суть вси от нас.