Книга Деяния св. Апостолов Cтих 3

и изведше вне града, камением побиваху его: и свидетелие ризы своя положиша при ногу юноши нарицаемаго савла, Савл же, еще дыхая прещением и убийством на ученики Господни, приступль ко архиерею, иже сей путь гоних даже до смерти, вяжя и предая в темницу мужы же и жены, еже и сотворих во иерусалиме, и многи от святых аз в темницах затворях, власть от архиерей приемь: убиваемым же им прилагах совет: и на всех сонмищих множицею мучя их, принуждах хулити: преизлиха же враждуя на них, гонях даже и до внешних градов. аз бо есмь мнии аплов, иже несмь достоин нарещися апл, зане гоних церковь Божию. Слышасте бо мое житие иногда в жидовстве, яко по премногу гоних церковь Божию и разрушах ю, по ревности гоних церковь Божию, по правде законней быв непорочен. бывша мя иногда хульника и гонителя и досадителя: но помилован бых, яко неведый сотворих в неверствии:

Разсеявшиися же прохождаху, благовествующе слово.

Филипп же сошед во град самарийский, проповедаше им Христа:

внимаху же народи глаголемым от филиппа единодушно, слышаще и видяще знамения, яже творяше:

дуси бо нечистии от многих имущих я, вопиюще гласом велиим, исхождаху, мнози же разслабленнии и хромии исцелишася:

и бысть радость велия во граде том.

Муж же некий, именем симон, прежде бе во граде волхвуя и удивляя язык самарийский, глаголя некоего быти себе велика,

емуже внимаху вси от мала даже до велика, глаголюще: сей есть сила Божия великая.

Внимаху же ему, зане доволно время волхвовании удивляше их.

Егда же вероваша филиппу благовествующу яже о царствии Божии и о имени Иисус Христове, крещахуся мужие же и жены.

Симон же и сам верова и крещься бе пребывая у филиппа: видя же силы и знамения велия бываема, ужасен дивляшеся.

Слышавше же иже во иерусалиме апостоли, яко прият самариа слово Божие, послаша к ним петра и иоанна,

иже сошедше помолишася о них, яко да приимут духа святаго: